Finantziamentos pùblicos noos e mudamentu de destinatzione de impreu pro s’àrea cummertziale: s’iter pro fraigare s’istàdiu nou sighit. Su presidente de su “Cagliari Calcio” Tommaso Giulini e su sìndigu Paolo Truzzu ant presentadu a s’imprenta in novas noas chi pertocant su fràigu de sa domo noa de is “rossoblù”.

Si totu s’iter burocràticu s’at a serrare intro de su 2023, s’annu imbeniente, su 2024, at a èssere s’annu de pònnere sa primu perda. “S’ispera est cussa de presentare intro sa fine de freàrgiu su progetu definitivu e su pranu econòmicu — finantziàriu, ma unas canto barrancos acapiados fintzas a sa chirca de is matèrias primas, s’òbligat a abetare ancora”, at nado su presidente Giulini, “De is istimas de oe su costu at a podet lòmpere, prus o mancu, a 125 milliones de èuros. Unu progetu abissiosu chi pro ddu fàghere abisòngiat s’agiudu de totus. “Intro de custa tzifra non ci sunt àteros oneres. Pro nos su contributu lompet de su Comunu, ma non creo chi sa Regione non fatzat sa parte sua”, narat ancora Giulini, remonende chi sa punna est sa matessi de bator annos colados, ma carchi cosa de su progetu initziale est mudadu, a comente, pro esèmpiu, su nùmeru de is postos.

“Sa Figc at a torradu a mustrare sa voluntade de fàghere in Casteddu is cumpetitziones internatzionales, pro custu su nùmeru de is postos at a passare de 25 a 30 milla postos”. Su Casteddu at fatu un’acòrdiu cun Cosim, una sienda bergamasca intra issa ant a passare totus is finantziamentos. “Pro nos custu no est solu un’apaltu, ma un’investimentu ca creimus in custu progetu chi at a èssere de importu mannu a livellu mundiale. — narat Francesco Percassi de Cosim. — “Èssere postos paris a un’iscuadra aici de importu est pro nos unu bàntidu. Bolemus fraigare un’òpera bona e chi duret tempus meda. Ma bolemus fàghere addobiare fintzas siendas locales”.

De Bergamo a Casteddu? “Su progetu est bellu meda e est de fundamentu sa collaboratzione pùblicu privadu. Est, in is ùrtimos annos, su primu istàdiu totu nou, no est una ristruturatzione”, serrat Percassi.

“Cun s’acòrdiu intra Cosim e Cagliari Calcio si fàghere un’àteru iscaleri chi s’at a portare a fraigare s’istàdiu, narat cun gosu su sìndigu Paolo Truzzu, “Seu inoghe ca nch’est un’interessu pùblicu mannu pro su fràigu de s’istàdiu e deo bolu chi si fatzat custa òpera de importu non solu pro su Casteddu, ma fintzas pro sa tzitade e sa Sardigna, mescamente est s’ocasione de luidura pro su cuartieri de Sant’Elia”.

“Est un’operatzione manna, chi si depet fàghere a manera crara e chi si fàghere cun un’iter longu e craru. — sighit Truzzu — Dae inoghe partimus pro lòmpere a su progetu ùrtimu chi s’at a permìtere de fàghere sa gara de apaltu e a cummente amministratzione amus a fàghere de totu pro garantire is risursas netzessàrias pro tramudare su cuartieri. Custa zona depet essire sa zona de s’isport e de s’ispàssiu, ma fintzas atratzione turìstica. S’amministratzione comunale faghet sa parte sua pro regalare a totus unu istàdiu”.

Pro Truzzu est unu progetu pro totu sa tzitade. “Su fatu chi manchet su tzentru cummertziale bandat bene. Custu at a depet essire, a comente apo nado, unu logu de isport e de ispàssiu. A su postu de su tzentru cummertziale ci at a èssere unu museu de sa sièntzia e de s’innovatzione, de importu mannu pro Casteddu”, serrat su sìndigu, remonende, “Is traballos pro derrùere su Sant’Elia s’ant a fàghere in antis de s’inghitzu de is traballos pro s’istàdiu nou”.

 “Progetto finanziato con l’Avviso Pubblico IMPRENTAS annualità 2021-2022”

Claudio Ranieri est bistadu nomenadu Allenadore Gentleman de sa serie B 2022/2023 in onore de Gigi Simoni, retzinde su titulu gratzias a sas prefferentzias espressadas dae sos vinti allenadores de sa serie BKT. Custu riconnoschimentu arribat pustis de aere giai binchidu su premiu duos annos faghede, pigande su testimonzu dae Stefano Pioli, chi aiat binchidu s’annu prima.

S’integru de su premiu si est tentu in Milano, inube Ranieri at retzidu sa Torretta de San Siro, simbulu de unu premiu chi tzelebrat sos balores beros de su giogu de sa botza, in mesu de su cale, su Fair Play, chi s’allenadore de su Casteddu incarnat in manera tipu.

S’ordiminzu de su Premiu Gentleman, ideadu dae Gianfranco Fasan, cun s’azzudu de sa Lega Serie B, at bidu sa presentzia de sa famiglia de Gigi Simoni, paris a amigos e gasetteris comente Luca Tronchetti e Alberto Cerruti, e de su presidente de su Coni CRL Marco Riva.

Ranieri at espressadu s’ingraenzu sou retzinde su premiu a nomene de Gigi Simoni, deffinindelu un’omine mannu e evidentziande s’importantzia de su Fair Play in su giogu de sa botza e in s’isport in generale. Su presidente de sa Lega B, Mauro Balata,at bantadu Ranieri commente una figura istravanada de su giogu de sa botza in Italia, evidentziande su rolu sou de puntu de relata po sos giogadores e allenadores zovanos,tambene comente isparghidore de sos menzus balores isportivos.

Su premiu est bistadu dadu a Ranieri non solu po su sutzessu battinde su Casteddu in Serie A, ma mescamente po sa lessione de isportividade in sa finale Play off, inube at dimandadu a sos tiffosos suos de nde la finire cun sos allolojos e de tzacullimanare sos tiffosos de su Bari, mustrande rispettu mannu po sos ribales e favoressende s’isportividade in mesu de sas duas isquadras. Custu attua at corpadu tottu sos allenadores de sa Serie B, chi l’ ant premiadu commente su chi meritaiat de piusu in s’annu 2022/2023.

Gianfranco Fasan, s’ordiminzadore de su premiu, at bantadu Ranieri, non solu po custu attu de currettesa, ma puru po s’esempiu custante de lealtade e rispettu po su ribale, balores chi dant trauda positiva a su giogu de sa botza e a s’isport.

Su premiu Allenadore Gentleman “Gigi Simoni”, marcat s’incomintzu de s’edisssione numeru 29 de su Premiu Gentleman Fair Play, chi si at a tennere in s’iscola Militare Teuliè de Milano. At a presentare Massimo Caputi paris cun Laura Barriales e Giorgia Rossi, e at essere tzelebrada giobia 16 de maju e at biere s’assignadura de medas riconnoschimentos, in mesu de sos cales sos Giocadores Gentleman de sa Serie A e su premiu Gentleman Mario Morosini, dedicadu a su giogadore chi incarnat a su menzus su Fair Play in sa Lega B.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22