Su Comunu de Casteddu torrat gràtzias a su Rotary pro sa cadira a rodeddas donada a sa Galleria comunale de Arte

Bonas noas pro is bisitadores de is Museos Tzìvicos de Casteddu chi tenent dificultade a si mòvere. Dae oe ant a tènnere a disponimentu una cadira a rodeddas pro pòdere bisitare sa Galleria comunale.

Est a beru una noa bona. Dae oe is bisitadores de is Museos Tzìvicos de Casteddu chi — mancari non tèngiant una disabilidade grae chi ddos òbligat a si dèvere mòvere semper cun unu presìdiu sanitàriu — tenent dificultade de caminare opuru a abarrare a camba pro meda tempus, ant a tènnere a disponimentu una cadira a rodeddas pro pòdere bisitare sa Galleria comunale. Sa cadira est istada regalada a su museu dae su Rotary Club Casteddu, assòtziu chi dae semper est atentu a is bisòngios de is persones cun dificultades. Immoe duncas peri is persones cun disabilidades o chi non tenent dificultade a caminare o a abarrare a sa ritza pro tempus meda, ant a pòdere ammirare is òperas custodia e espostas in sa Galleria Comunale.

Su Presidente de su Rotary Club Casteddu Est, Stefania Bandinelli, difatis eris a merie at donadu in modu ufitziale sa cadira a rodedda a s’Assessora a sa Cultura de su Comunu de Casteddu Maria Dolores Picciau, chi at torradu gràtzias a su Rotary cun custos  faeddos “In unu momentu discumbeniosu meda pro sa salude de is persones chi ant dèvidu cambiare is cumportamentos sotziales issoro pro more de s’epidemia, su gestu de su Rotary Club de Casteddu Est donat unu singiale de isperu e de fide pro unu benidore mègius, mescamente pro chie est in dificultade e est prus vulneràbile”.

“Atziones che a custa  serbint pro agiudare in modu profetosu is persones prus dèbiles — at concruidu s’assessora a sa Cultura Maria Dolores Picciau — e in su matessi tempus serbint pro promòvere su connoschimentu de is prendas culturales de sa tzitade nostra”.

Carbònia, su Museo de su Carbone: unu viazu in sos tempos de sa memòria de su Sulcis de sas minas.

In su corizone de Carbònia, a intro de sa ‘idditzola de de Serbariu, b’at a dies de oe unu de sos museos pius de importu de sa Sardigna. Est su Museo de su Carbone, chi est dedicadu a s’istoria de sas minas. Est unu logu chi nos contat non solu s’istoria de cussu logu, ma fintzas sa vida de òmines e fèminas chi po annos e annos ant triballiadu in cussas minas.

Serbariu, inube si triballiaiat dae su 1937 a su 1964, fuit comente una funtana de abba semper bundante, inube sa zente si nche catzaiat su sìdiu de su tribàlliu. Est cussu su logu chi at batidu dinare meda a sa zona, ma puru energia manna a totu s’Itàlia. Su carbone de cussas minas, infatis, daiat tribàlliu a sas fàbricas, a sas tzentrales e a sas ferrovias, diveninde motore de modernizatzione industriale de totu sa natzione nostra.

Addaghi ant serradu sas minas, cussos logos pariat chi nos nche los depimus ismentigare, ca pariat chi non b’aperat abbarradu pius nudda. Invetze, b’ant fatu unu prozetu de recùperu e de valorizatzione manna, dande vida noa a totu cussos logos, chi sunt divènnidos unu museo chi, ancora a dies de oe, betat a pare sa memòria istòrica, sa didatica e sa capatzidade de divulgatzione.

Po chie andat a bìere custu museo, b’at paritzos zassos de visitare. B’est sa lampisteria, chi est su logu inube b’at una mostra chi est aberta totu s’annu e chi nos contat s’istòria de su carbone, de sa mina e de sos caragolos suos,ma puru de sa ‘idda de Carbònia, nàschida in su 1938 po retzire sas famìlias de sos triballiantes. Incue b’at unu muntone de làmpanas antigas chi si impreaiant in sas minas, ma b’at fintzas trastes e documentos, filmigheddos de sos tempos de tando fatos a sos triballiantes e puru intervistas fatas addaghi sa mina fuit zai serrada.

B’at puru fotografias meda de una bellesa rara. In custos caragolos e percolos chi nos permitint de atraessare sa mina, si podent bìere totu sos logos chi cada die sos minadores pupulaiant addaghi andaiant a triballiare. In sa sala Argani bi sunt poi totu sas màchinas chi permitiant su tribàlliu a tempos de tando.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22