Su sìndigu de Lanusè e presidente de sa Cunferèntzia sòtziu sanitària ogiastrina, Davide Burchi: «No amus agabbare de nos cheschiare e de nos fàghere intèndere fintzas a cando su problema no at a èssere risòlvidu e s’ispidale afortigadu.»

Dae eris e finas a su 20 de ghennàrgiu sighente, su naschidòrgiu s’ispidale de Lanusè at a abarrare serradu in modu temporàneu.

Unu grave discumbèniu pro sas mamas ogiastrinas chi ant a èssere custrintas a andare in sas àteras istruturas sanitàrias de sa Sardigna pro pòdere fàghere nàschere sos figigeddos issoro.

Sa serrada de su puntu nàschida est istadu causadu dae sa mancàntzia de personale in su repartu Pediatria e Neonatologia. A garantire s’assistèntzia in casu de apreu ant a èssere sos repartos de Ginecologia e Ostetricia. Fintzas Pediatria at a abarrare ativu ogna die dae sas 8.00 a sas 20.00 pro garantire su servìtziu de consulèntzia in su Prontu Sucursu e cussu ambulatoriale.

Subra de sa situatzione grave amus intesu su sìndigu de Lanusè e presidente de sa Cunferèntzia sòtziu sanitària ogiastrina, Davide Burchi.

«S’assessore regionale a sa Sanidade Nieddu – afirmat Burchi – aiat garantidu chi in s’ispidale de Lanusè diant èssere arribbados pediatras dae su Brotzu. A su presente, a pustis de l’àere torradu a intèndere m’at naradu chi sunt traballende pro chircare de agatare una solutzione lestra. Pro s’ora su Puntu nàschida at a abarrare serradu finas a su 20 de ghennàrgiu.»

«In Cunferèntzia sòtziu sanitària – at sighidu su primu tzitadinu lanuseinu – fiat essidu a campu chi sa serrada diat èssere istada a su màssimu de unas cantas die, e non pro meda tempus. Duncas sa recherta nostra est semper sa matessi: agatare unu modu pro chi s’ispidale tèngiat funtzionalidade prena.»

«Pro nois su naschidòrgiu est unu chistione de orgòlliu – sighit su presidente de sa Cunferèntzia sòtziu sanitària – siat pro sos problemas acapiados a su partu e possìbiles nàschidas chi diant pòdere acontèssere in caminu, comente a dolu mannu est capitadu medas bas . Una situatzione chi non bolimus sutavalutare e chi nos apessamentat meda.»

«Duncas semus organizende un‘atopu in Casteddu in assessoradu regionale – at agiuntu su sìndigu – cun s’assessore Nieddu o mancari cun su guvernadore Solinas, in modu chi detzidant de risòlvere custu problema grave. Fintzas ca in ocasione de su controllu Covid de custas dies, sos comunos ogiastrinos ant dimustradu de èssere in prima lìnia e de èssere semper disponìbiles a su chi benit rechertu a livellu regionale. Duncas pensamus de meritare atentzione pro su chi faghimus, fintzas pro more de sas dificultades in sa zona nostra chi dipendet dae sos trasportos e non petzi, e pro sa distàntzia dae sos àteros territòrios de s’Ìsula.»

«Duncas no amus a abbassare sa guàrdia e amus a sighire a protestare e a nos fàghere intèndere fintzas a cando custu problema no at a èssere risòlvidu e finas a cando totu s’ispidale de Lanusè no at a èssere afortiadu», concruit Burchi.

 “Progetto finanziato con l’Avviso Pubblico IMPRENTAS annualità 2021-2022”

Sa fine drammatiga de su zovanu benturzu Arricelli, pustis de su bolu attrividu dae sa Sardigna a sa Sicilia, nos ammentat sos arriscos de sos movimentos de ispartinadura de sos zovanos alabros.

Su destinu sou, interrumpidu cando fit bolande supra su mare in mesu de Punta Raisi e San Vito lo Capo, nos ponet daenanti a sa debilesa de custas creaduras magniffigas, in d’unu mundu semper pius bortadu a sos interessios de sos
omines.

Arricelli fit unu de sos 15 benturzos de sa colonia noa de su Sarrabus- Gerrei, e sa perdida sua est una disgrassia non solu po sa comunidade iscentifica chi lu compudabat, ma puru po tottus sos chi appretziant e si affuscant de sa rimunida de sos animales arestes.

Bell’e chi non tottu est perdidu. In su mentres chi pranghimos sa perdida de Arricelli, semus animados dae sos sutzessos e dae sa resistentzia de sos atteros membros de sa colonia de Villasalto. Su benturzu Sannicolò sighit s’iscumbattamentu de sa Sardigna, ispinghindesi cun atza in medas regiones de s’isula, cun su bentu chi che lu diat leare fintzas in Corsica.

A sa mattessi manera, sos atteros benturzos commente Sinnai,Ballao,Gerrei,Armungia,Quirra e Muravera, mustrant unu adattamentu chi surprendet meda, addurante po su pius tempus in sa sura de sos Sette Frades, ma iscumbattande puru iscroccas pius attesu, ma torrande semper a sa sicuresa de sa gabbia Forestas. S’azzudu de sos pastores, commente sos frades Aledda, est importante meda po garantire unu approvistamentu de cosa de pappare po sos benturzos.

Su rolu insoro non solu assicurat chi custas creaduras ispantosas potant bivere, ma azzuat puru a su sutzessu totale de su disignu po conservare sos benturzos, apparande unu ispartimentu ecologicu de sas carasas chi faghet bene siat a s’ambiente siat a sa comunidade locale.

In su mentre chi pranghimos sa perdida de Arricelli, rennovamos s’impignu nostru po diffendere e preservare sas zenias minettadas, pro itte atteras disgrassias commente custa si potant iscansare e chi su chelu sigat a essere surcadu dae sas alas de custos alabros magnifficos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22