Su Casteddu depet bortare pàgina in presse e si depet cuntzentrare a pitzu de sa gara de campionadu contra s’Inter.

Sa punna est sa de leare calicunu puntu dae Milanu, pro regalare una satisfatziones manna a is tifosos, a pustis de giorronadas medas sena bìdere mancu una vitòria.

Is ruju-blu sunt galu delusos pro sa gara pata contra su Torino in sa partida de lunis coladu. A pustis de s’autogol de su tonaresu Carboni, is casteddajos sunt resèssidos a recuperare in su segundu tempus gràtzias a sa furriada ispantosa de Joao Pedro in una partida giogada bene dae su Casteddu, a su cale est mancadu s’acunnortu de cungiare sa partida. Is sardos in custa prima parte de istajone sunt lissinados in sa coa de sa classìfica, cun a palas sa Salernitana ebbia.

Is giogadores de Walter Mazzarri depent fàghere proa manna contra s’iscuadra ghiada dae Simone Inzaghi, dimustrende torra su caràtere mannu bogadu a campu a s’acabbu de s’istajone colada.

No at a èssere fàtzile a bìnchere contra is nieddos-asulos, chi òcupant sa segunda positzione de sa classìfica de su campionadu e ant conchistadu puntos medas in is ùrtimas garas, chi ant semper bìnchidu.

Is ruju blu ant fatu battr parègios ebbia in is ùrtimas chimbe partidas. At a èssere unu desafiu difìtzile pro su Casteddu, chi in Milanu no at bìnchidu medas bias in totu is campionados giogados in Sèrie A.

Is sardos ant a afrontare is milanesos sena Nandez a su tzentrucampu e Cepitelli a sa difesa, peri si at a torrare Godin – ex giogadore nieddu-asulu -.

Pro su restu sa formatzione non diat dèpere cambiare meda rispetu a cussa de lunis, contra is òmines de Juric. S’atacu at a èssere totu in is palas de su brasilianu Joao Pedro chi est istadu su protagonista de s’ùrtima partida colada.

S’Inter at a calare in campu cun sa formatzione de semper- sena s’atacante Dzeko -, a s’ex casteddaju Barella su còmpitu de iscasidare sa còpia de atacu formada dae Sanchez e Lautaro Martinez.

A dirìgere sa partida at a èssere s’àrbitru Marchetti.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Piantagione manna de marijuana in sa zona de Aristanis: noe arrestos e fua impedida dae sos carabineris

Una piantagione manna de cànnabis cun prus de 7 mìgia prantas est istada iscoberta in sas campagnas de Terraba, a canta a Aristanis, cun su bilàntziu de noe arrestos, e intre custos unu minorenne. S’operatzione, fata dae sos carabineris de su Repartu Operativu – Nùcleu Investigativu de Aristanis paris cun su Corpus forestale e de vigilàntzia ambientale de sa Sardigna, est unu de sos secuestros prus de importu de sa zona in sos ùrtimos meses.

S’iscoberta de custa cosa est su frutu de un’atividade atenta de controllu de su territòriu dae sa forestale de s’istatzione de Marrùbiu, chi ant agatadu sa coltivatzione suspeta, sighida dae osservatziones remotas fatas cun drones paris cun sos carabineris. Sos atzertamentos in contu de THC, fatos dae su RIS de Casteddu, ant cunfirmadu chi sas prantas cunteniant livellos de printzìpiu ativu prus artos meda de sos lìmites de lege.  Est sa de chimbe piantagiones secuestrada in zona de Aristanis in sos ùrtimos duos meses.

Su blitz est iscatadu cando sos militares ant agatadu unas cantas persones chi tentaiant de nde tirare sas prantas in su terrinu tra Terraba e Arcidanu. Mancari s’alt de sos carabineris, sos suspetados ant chircadu de si nche fuire. Unu de sos mezos est istadu blocadu luego in ie, mentres a sos àteros duos lis ant postu fatu peri sas istradas de sa zona.

Su primu l’at firmadu sa patùglia Radiomobile, s’àteru l’ant intertzetadu in Àllai, in ue sas patùglias de sos carabineris de Mògoro ant blocadu ses chi si nche fiant fuende, luego los ant percuisidos e leados a caserma. Cando ant controlladu sos mezos ant agatadu ràdios rice-trasmitentes, passa-montagna, atretzos pro ispacare e segare e dinari in contante, totu cosas chi faghent a cumprèndere chi esseret unu
progetu organizadu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”