Is ingredientes pro una gara ispantosa ddoe fiant totus, ma s’ùrtimu giru de su Gp de Abu Dhabi 2021 de Fòrmula 1 at superadu totus is aspetativas.

Sa gara, chi si fiat aviende cara a unu finale belle iscontadu cun Hamilton cun sa Mercedes campione de su mundu, capatzu de donare unu ritmu mannu a sa gara e de superare Verstappen in partèntzia, est istada furriada dae s’intrada de sa vetura se seguresa pro s’intzidente de Latifi.

S’intrada in pista de sa màchina de seguresa a solu 5 giros dae sa fine at torradu a murigare is cartas. Craru chi sa Red Bull nde at aprofitadu de s’ocasione pro arriscare totu ponende gommas moddes pro proare s’assàrtiu finale a Hamilton. S’inglesu imbetzes est abarradu in pista cun is gommas tostadas. Un’istrategia chi sa Mercedes at a pagare a caru prètziu.

A s’ùrtimu giru, difatis, in una pista lìbera, Verstappen, cun sa Red Bull nùmeru 33, at fatu unu sorpassu binchidore a dannu de Hamilton chi, custa borta, no est resèssidu a contratacare. Polèmicas a parte, Hamilton e Verstappen ant fatu un’istajone istravanada, unu tene pro tene ispantosu acabadu cun unu corpu de iscena ancora prus incredìbile. Verstappen conchistat in custu modu su tìtulu de campione de su mundu, e sa Mercedes su campionadu costrutores. A sa fine Hamilton, cun isportividade, at fatu is complimentos a Verstappen.

Sa gara est istada emotzionante giai dae deretu. Verstappen, autore de una partèntzia non bona, est istadu difatis superadu dae su rivale. A su primu giru però s’inglesu est istadu atacadu e superadu dae s’olandesu in sa borta 7, resessende però a si torrare a pigare sa positzione pighende sa bia de fua. A pustis de su valzer de is pit stop, e mancari s’atzione de istorbu fata dae Perez, chi pro unu pagu est resèssidu a poderare a palas a Hamilton, su pilota inglesu pariat chi tènnere in manu una vitòria mancu tropu sacrificada, difatis su ritmu suo fiat superiore. Ma s’intzidente de Latifi at cambiadu su cursu de is eventos.

Òtimu su de tres postos pro Sainz cun sa Ferrari nùmeru 55, autore de una gara sòlida. Sa Ferrari aguantat gasi su de tres postos in su mundiale costrutores a dannu de sa McLaren.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Sardigna, differridu in Giunta un’attera borta su càmbiu intre Satta e Agus

S’isettu andat prus de su chi si previdiat. In sas oras passadas si pensaiat chi sa sostitutzione de s’assessore a s’Agricultura, Gianfranco Satta, poderat essere fatta giai in su mentres de sa Giunta a pustis de sa manòvra finantziària. Si pensaiat chi su  cambiu esseret derettu, fintzas dadu pro seguru, e imbetzes su càmbiu no est ancora arribadu. Sa situatzione abbarrat frimma, e custu alimentat dimandas supra de sos tempos e de sos intentos de sa majoria.

Satta, chi dae tempus non tenet prus sa cunfiàntzia de su partidu sou de riferimentu – sos Progressistas, ghiados dae su sìndigu de Casteddu Massimo Zedda – diat dèpere èssere cambiadu cun su capogruppu de sos matessi Progressistas in su Cunsizu regionale, Francesco Agus. Si tratat de unu cambiu cunsideradu oramai iscapidhu dae sas fortzas polìticas implicadas, ma, a dispetu de custu, mancat ancora una data pretzisa. Custa allentada est in dèpidu a causare irritatzione creschente in intro de su partidu, in ube in medas diant àere prefferridu una detzisione lestra pro apartare àteras tensiones e intzertesa.

In su mentres prima de sa Giunta giamada a aprovare sa finantziària regionale de 10 miliardos de èuros, Satta at sighidu a si mustrare operosu e cuntzentradu in su tribagliu sou. At ispiegadu de èssere ancora impegnadu in su tentativu de dare rispostas a su mundu agrìculu, unu campu chi in custos meses at mustradu dificultades e dimandas insistentes. At ammentadu de àere giai fissadu impignos istitutzionales diferentes, intre sos cales
un’addobiu programmadu pro su 20 de santandria cun su ministru de s’Agricultura Lollobrigida. In cussa ocasione ant a èssere discuttidas sas preoccupatziones fatas dae su Cunsòrziu de su Pecorinu Romanu, ligadas a sos dazios subra de sas produtziones de su casu impostas dae sos Istados Aunidos cun s’amministratzione Trump, unu tema chi sighit a creare dudesa pro sos tribagliadores sardos.

Satta, a sighidu, at mustradu de si cunsiderare in antis de totu unu cunsizzeri regionale de sa Sardigna e de intendere in manera forte sa responsabilidade de s’incàrrigu assessoriale chi tenet.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”