At a intrare a vigore cras, lunis su 6 de mese de idas, su super tzertificadu birde.

Obietivu? Atremenare s’ispàinu de su virus e evitare serradas noas . Sa tzertificatzione afortigada previdet medidas prus severas pro chi no est vatzinadu.

In s’ispetzìficu, proamus a rispòndere a is pregontas prus comunas de custas dies.

Ite càmbiat cun su decretu nou? Su decretu chi at a èssere in vigore dae su 6 de mese de idas a su 15 de ghennàrgiu previdet duos tzertificados, base e afortiadu.

Ite est e comente s’otenet su tzertificadu «base»? Est sa tzertificatzione birde chi benit emìtida cun su tampone, antigènicu o molecolare.

Comente s’iscàrrigat? S’otenet in donu andende in su giassu de su guvernu (dgc.gov.it) cun tessera sanitària o identidade digitale (Spid/Cie). Faghet a dd’otènnere fintzas iscarrighende s’aplicativu Immuni o andende in su situ de su Fascìculu Sanitàriu Eletrònicu Regionale.

Comente benit compidadu su tzertificadu birde? Cun sa versione noa de s’aplicatzione de su ministeru de sa Salude. Verìfica C19 reconnoschet si su tzertificadu est base o afortiadu.

Cun sa tzertificatzione birde base faghet a andare a traballu? Eja, su tzertificadu s’otenet fintzas cun su tampone restat bàlidu pro totu is traballadores chi non tenent s’òbrigu vatzinale.

Pro andare a su ristorante bastat su tzertificadu base? Dae su 6 de mese de idas, pro intrare a unu ristorante a su serradu serbit su tzertificadu birde afortiadu.

Cun su «base» faghet a andare a su tzìnema, a teatru, a s’istàdiu, o a discoteca? Nosse, dae su 6 de mese de idas serbit su tzertificadu birde afortiadu.

In zona groga is discotecas ant a èssere abertas? Eja, ma su tzertificadu birde base non balet.

In su postale e in sa metro si biàgiat cun su tzertificadu birde? Eja. Dae lunis su 6 de mese de idas in su postale, metropolitanas e trenos locales si podet biagiare solu cun su tzertificadu birde, afortiadu o base: duncas andat bene fintzas unu tampone negativu.

Cantu durant is tampones pro su tzertificadu birde ? Sa balidesa pro su molecolare est semper fissada a 72 oras e pro s’antigènicu a 48 oras.

Cando intrat a vigore su tzertificadu birde afortiadu? Su tzertificadu birde afortiadu o super tzertificadu birde cumentzat dae cras, su 6 de mese de idas.

Chie ddu podet otènnere? S’otenet cun sa segunda dose de vatzinu ebbia o cun su sanamentu dae su Covid. Chie est sanadu o s’est sutapostu a duas doses prus pagu de noe meses a oe non nde depet pedire unu nou, balet cussu otentu a tempus suo.

Comente si faghet a ddu iscarrigare, a ddu visualizare o a ddu istampare? S’otenet a in donu andende in su giassu de su guvernu (dgc.gov.it) cun tessera sanitària o identidade digitale (Spid/Cie). Si podet fintzas iscarrigare s’aplicativu Immuni o andare in su situ de su Fascìculu sanitàriu eletrònicu regionale.

Pro andare a traballu serbit su «super» pass? Pro traballare bastat cussu base.

Cantu durat su tzertificadu birde afortiadu? Noe meses a pustis de sa segunda dose de vatzinu o a pustis de su sanamentu. Si a s’iscadèntzia de su perìodu non si faghet sa de tres doses, su tzertificadu birde afortiadu no est prus bàlidu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”