S’ùrtima partida de sa 16a giorronada de su campionadu de Sèrie A at bidu sa calare in campu su Casteddu ghiadu dae Walter Mazzarri contra su Torino de Ivan Juric.

In is muros amigos de s’Unipol Domus, is sardos e is piemontesos ant paregiadu 1-1, gratzàs a s’autogoal de Carboni pro is granatas, e a su gol de Joao Pedro pro is ruju-blu.

Tzertu unu resurtadu prus malu pro is casteddajos chi sunt a coa meda de sa classìfica generale, cun a palas sa Salernitana ebbia a s’ùrtimu postu.

Is òmines de s’allenadore toscanu ant pigadu sa prima rete in su primu tempus a su minutu nùmeru 31, cun su tzentrucampista Pobega chi at fatu s’atzione e at agatadu su disviu de su defensore tonaresu cun su portieri Cragno chi at faddidu pro more de su distrubu de s’atacante Sanabria.

A sa metade de su segundu tempus su Casteddu at agatadu sa rete gratziàs a sa furriada bella meda de su capitanu Joao Pedro – pro su brasilianu su gol nùmeru noe in custa istajone -.

A pustis de s’1-1 is sardos ant chircadu sa rete de su vantàgiu, ma non sunt renessidos a ddu fàghere, antzis est istadu su Torino a andare a curtzu de su 2-1 cun su tzentrucampista Praet, ma pro sorte bona de is sardos no at marcadu su gol.

Is tifosos ruju-blu sunt comintzende a pèrdere sa passìentzia pro ite is partidas a s’Unipol Domus sunt de bìnchere pro fortza, chi s’iscuadra si bolet sarbare. Cun custa gara sunt 13 is partidas cun s’allenadore Mazzarri in sa banchita cun una vitòria ebbia. Tropu pagu a beru pro chircare de abarrare in sa màssima categoria natzionale de fùbalu.

Sa partida benente a Milanu contra s’Inter de Simone Inzaghi at a èssere unu disafiu istragosu meda pro is casteddajos, pro ite ant a giogare contra una de is iscuadras prus balentes de su campionadu. Is milanesos sunt is campiones de Itàlia in càrriga e mancari Antonio Conte no est prus su tècnicu e s’atacante Lukaku cun su tertzinu Hakimi sunt partidos in àteras ligas istràngia de fùbalu, in custa istajone puru ant a chircare de torrare a bìnchere s’iscudetu. Duncas dae s’Istàdiu San Siro at a èssere difitzile meda pro su Casteddu a nde torrare in Sardigna cun calicunu puntu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22