Torrat su tempus malu in Sardigna.

Un’avisu de cunditziones meteorològicas cuntràrias pro nie e astra in Sardigna est istadu trasmìtidu dae sa Protetzione tzivile regionale.

Dae mesudie de domìniga su 5 de mese de idas e finas a is 12 de lunis su 6 de mese de idas- si leghet in su comunicadu – est prevìdida “una perrturbatzione manna chi andat dae s’Àrticu a su Nord Àfrica, interessende totu s’Europa.

S’undulatzione prus otzidentale de s’istrutura at a cumintzare dae notesta cara a meridione, veiculende subra de sa Sardigna àera frita e intzipida de umidade”.

Segundu is previsiones de s’ufìtziu mèteo de s’Aereonàutica militare de Dèximu Mannu, ” in Sardigna at a torrare a niare dae sa serada de domìniga 5 e in sa die de lunis 6, semper in sa parte otzidentale, a cumentzare dae is 500 metros subra de su livellu de su mare. Ddoe at a àere fintzas un’abasciamentu mannu de is temperaduras, chi ant a calare peri de 10 grados e comente si siat no ant a èssere superiores a is 8-10 grados in pranura”.

Sa Protetzione Tzivile invitat at a sa “prudèntzia màssima a chie s’agatat a sa ghia de un’automòbile o de unu motoveìculu. In prus racumandat de evitare de colare suta is sutapassos, sende chi si diant pòdere allagare fintzas a sa lestra. Est pretzisu moderare sa velotzidade pro more de sa reduida de sa visibilidade e de s’asfaltu liscinosu pro s’abba, chi abbasciant su tretu de frenada de is veìculos. Fàghere una pàsida in una pratzita o in logu seguru durante is fases prus intensas de s’eventu”.

Duncas at a tocare a bardianare mescamente in is zonas de monte, ma non solu bidu fintzas s’abbassiada repentina de sas temperaduras.

De seguru custa undada noa de tempusmaliu at a creare problemàticas noas a su cumpartu agrìculu, cun medas imprendidores giai postos in ghenugros dae is niadas de sa chida colada.

A dolu mannu custu atòngiu, a pustis de su calore meda, est divènnodu fritu meda, proinosu e caraterizadu dae niadas bundantes. Cun bulletas de energia elètrica e de is àteras castas de riscaldamentu chi sighint a aumentare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Stefano Oppo, braga de su canottaggiu sardu, at segudadu unu nou sonniu de sa carriera sua paris cun su cumpanzu Gabriel Soares,triunfande in sa porfia de cropa de sos carricos lepios, in s’urtima fase de sa Coppa de Su Mundu de Canottaggiu in Varese.

Sa binchida insoro est bistada unu triunfu, non solu personale, ma puru po s’isport de sa Sardigna, chi si est distintu supra de s’iscena internatzionale. Su primu postu in sa porfia de cropa carricos lepios est bistadu su puntu de arribbu de unu isforzu istravanadu de sos duos isportivos, chi si est bidu meda in su finale de sa porfia, chi che at bogadu s’alenu.

Chentza duda, unu momentu chi non si at podere ismentigare po issos, e unu motivu de arroddu mannu po sa comunidade isportiva sarda.

Stefano Oppo, naschidu in Aristanis, est arribadu a sa chima de sa carriera sua, binchinde s’oro in sa Coppa de su Mundu, paris cun Gabriel Soares, in sa cropa carricos lepios. Sa proa insoro est bistada desamplada,addobbande sos ribales isvizzeros Jan Schaeuble e Raphael Ahumada, in sos urtimos momentos de sa porfia.

Una cumpetissione ammaghiante chi si est congruida cun sa conchista prena de gloria de sa medaglia de oro, mustrande unu arrebattu prenu de emotzione po sas Olimpiades de Parigi de su mese de lampadas de cust’annu.

Una binchida emossionante, accantzada cun d’unu recuberu istravanadu in sos urtimos metros contra s’Isvizzera, chi at dominadu sa porfia po casi tottu sa dura. Semus meda cuntentos, pro itte custa medaglia de oro est po nois unu riscattu beru, at cummentadu Oppo pustis de sa fine de sa porfia.

Commo, po s’atleta sardu, bi ant essere duas chidas de riposu e allenamentos cadrios, aspettande sos Campionados Europeos, chi si ant a faghere in Szeged in Ungheria, dae su 25 a su 28 de Aprile. At essere un’attera occasione po affortigare sa binchida insoro e sighire a essere su menzus de sa Sardigna e de s’Italia in su cataffale internatzionale de su canottaggiu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22