Ddoe at noas chi ammòdiant su coro de is letores e lassant una bella sensatzione.

Fatos chi non càpitant ogna die, ma chi in unu mare de noas de crònaca o de lecutos, torrant su coro a logu a totus. Semus faeddende de un’eventu acadèmicu particulare acontèssidu in Pùglia.

Un’istòria chi podet èssere un’esèmpiu pro medas fèminas ma in su matessi tempus pro s’Itàlia pro more de creare percursos iscolàsticos semper prus paritàrios tra òmine e fèmina.

Una làurea ispetziale pro un’istudiante universitària. Issa si narat Yvonne Monaco, tenet 28 annos e s’est laureada in Metodologia de s’interventu psicològicu cun 110 e lode e remonu ispetziale. Ddoe at un’aspetu chi rendet su fatu galu prus ispantosu. Yvonne, 24 oras prima, at partoridu sa prima fìgia sua, Lavinia, 3 chilos e 700 grammos.

A sa vigìlia de sa làurea sa pitica Lavinia teniat presse de nàschere. E gasi, a pustis de su rinviu de s’esàmene finale e a sa cursa in ispidale, sa giòvana mama at postu a su mundu una pisedda de 3 chilos e 700 grammos chi dd’at donadu sa fortza de fàghere unu sèberu: su de si laureare dae s’ispidale, colleghende•si cun unu computer dea sa clìnica Mater Dei de Bari cun s’universidade de Lecce, anninniende s’arribbada noa mentras sa cummissione fiat iscurtendedda discutende sa tesi.

A s’agabbu de sa discussione, tra is làmbrigas de cuntentu de sa laureanda e s’emotzione de is professores, su giudìtziu finale: “Esaminadu su currìculum de istùdios, ascurtada sa relatzione e cunsideradu s’èsitu de sa discussione, sa Cummissione dda proclamat ‘dotora in metodologia de s’interventu psicològicu’ cun votu de 110 e lode, e mentovu ispetziale”.

Unu casu etzetzionale custu de s’istudiante pulliesa chi at festadu su cumpleannu suo su 22 de ognasantu coladu. Una cosa chi seguru non s’at a iscarèssere mai.

S’augùriu pro sa mama-istudiante est chi si potzat realizare in modu professionale e chi potzat garantire unu benidore serenu a sa pitzinna sua, e fintzas issa a dda bìdere una die laureada.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Sardigna e Corsica: duas ìsulas sorres unidas dae s’istòria, sa natura e s’identidade

Divididas dae solu dòighi chilòmetros de mare, Sardigna e Corsica cumpartzint meda de prus de una parte de Mediterràneu. Custas duas ìsulas mannas , una italiana e s’àtera frantzesa, sunt ligadas dae raighinas antigas, paesàgios chi si assimizant e una identidade culturale forte chi affundat sas orìgines suas in unu passadu cumune.

In su cursu de sos sèculos, Sardigna e Corsica ant cumpartzidu eventos polìticos e dominatziones chi si assimizaiant. Ambas duas fiant bistadas
populadas dae nuràgicos e torreanos – tziviltades megalìticas chi ant fraigadu turres de pedra cun funtziones de defensa e de credu – e chi pustis ant connotu sa presentzia de sos Fenìtzios, de sos Romanos e de sos Pisanos.

Dae su puntu paesagìsticu, sas duas ìsulas s’assimìzant in manera ispantosa. Ambas duas oferint montes agrestes, costeras taghientes, buscos de elighes e suerzu, playas biancas e unu mare cristallinu. Sas Buccas de Bonifàtziu, bratzu de mare istrintu chi ddas dividit, est una de sas zuras marinas prus faschinosas e bentosas de su Mediterràneu, riccas de biodiversidade e amparada dae riservas naturales in ambas duas costeras.

Fintzas in sa cultura, sas affinitades sunt importantes. Sas duas ìsulas mantènent traditziones linguìsticas e populares fortes: su corsu e su sardu apartènent a sa matessi famìllia linguìstica romàntzia e presentant assimigliantzias in sa fònetica e su lessicu sorprendentes . Sa mùsica populare e sos cantos polifònicos testimònziant custu lìgamine, gai comente sas festas religiosas, sos costùmenes traditzionales e s’artesanadu, in ue su lignu, sa suerzu e sos tessidos sunt protagonistas cumunes.

Sos sardos e sos còrsos cumpartzint fintzas una trassa carateriale chi si reconoschet: orgòlliu, atzàpu a sa terra propria e ispìritu indipendente. Ambas duas populatziones tenent una istòria de resistèntzia culturale e de defensa longa de s’autonomia insoro, medas bortas in cuntierra cun sas autoridades tzentrales.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”