Seguru chi Gigi Riva non tenet bisòngiu de presentadas, pro cussu chi at rapresentadu e sighit a rapresentare pro sa Sardigna in prus de is marranias in su fùbalu.

Su chi est istadu su mègius giogadore su grupu de Manlio Scopigno, capatzu de bìnchere s’iscudetu istòricu de su ’69-’70 contra is coratzadas de su Nord Itàlia, a diferèntzia de medas àteros giogadores, at rinuntziadu a dinare meda e a is ofertas de is iscuadras mannas pro difèndere is colores de sa màllia de su casteddu.

Sa sèberu suo de no andare a sa Juventus chi aiat propostu dinare meda e noe giogadores in càmbiu de su cannoneri de Leggiuno, dd’at fatu amare fintzas dae is tifosos de is àteras iscuadras e custu at fatu de issu una figura immortale, mancari apat acabbadu de giogare dae paritzu tempus.

De seguru, si no aeret tentu totu cussa fèrtas in carriera, su Casteddu diat àere tentu calicunu tìtulu e copa natzionale in prus, e chissai comente diat èssere andada sa Copa de is Campiones.

Custu mangianu, in s’Auditòrium de su Cunservatòriu de Mùsica, est istadu presentadu in modu ufitziale s’eventu artìsticu tzelebrativu ‘Luigi’ in onore de Gigi Riva.

S’initziativa, patrotzinada dae sa Regione Autònoma de sa Sardigna, dae su Comunu de Casteddu e sustentada dae sa Fundatzione de Sardigna, at a andare in iscena in anteprima, giòbia s’11 de onniasantu 2021, a is 21:00, in s’Auditòrium de su Cunservatòriu “G.P. da Palestrina” e est giai in programmatzione pro su 2022 fintzas in su Teatru Lìricu de Casteddu pro acasagiare unu pùblicu prus mannu, comente grandu avenimentu e tributu sintzeru dae banda de totu sa Sardigna a “Luigi”.

Su progetu, totu pensadu dae su creativu Giorgio Pitzianti, co-produidu cun su Cunservatòriu de Casteddu, istitutzione acadèmica de Casteddu, e in collaboratzione cun sa Fundatzione de su Teatru Lìricu de Casteddu cun is maistrantzas suas, at a bìdere s’interessamentu artìsticu de s’atore e dopiadore Luca Ward chi cun sa boghe e capatzidade interpretativa sua at a agiuare s’ispetadore a printzipiare unu biàgiu introspetivu in su coro de Luigi.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’artèfitze de sa sarvesa insperata de su Casteddu est istadu esoneradu.

S’allenadore toscanu, Leonardo Semplici, est istadu bogadu dae sa ghia tècnica de s’iscuadra a pustis de àere fatu unu puntu ebbia in is primas tres dies de campionadu.

S’allenadore chi s’annu coladu aiat sostituidu a Eusebio De Francesco, pagat sa derrota in domo contra su Genoa, a pustis de èssere istadu in vantàgiu pro duos a zero finas a su 60’ e posca èssere istadu sorpassadu pro 2-3 in su finale.

Sa sotziedade no at cunsideradu is medas ausèntzias tra is giogadores de su Casteddu e su fatu chi Semplici no apat tentu mai totu is giogadores a disponimentu, comente sutaliniadu in su post iscritu in serada dae s’oramai ex allenadore.

Ma Semplici s’est dimustradu unu sennore, narende·si orgolliosu de àere rapresentadu su Casteddu e sa terra sarda. Immoe est ufitziale Walter Mazzarri, allenadore nou de su Casteddu. Su tècnicu ex Napoli, Inter e Torinu at firmadu unu cuntratu cun sa sotziedade finas a su 30 de làmpadas 2024.

Cun issu arribbant su vitze allenadore Claudio Bellucci, su preparadore atlèticu Giuseppe Pondrelli, su collaboradore tècnicu Claudio Nitti e s’analista de giogu Cristian Guerrini. Su cuntratu– segundu is primas informatziones ufitziosas – partit dae unu millione de èuros a istajone. Mazzarri, arribbadu a mangianu in su capulogu sardu, no at fatu decraratziones a is cronistas in s’aeroportu.

S’est limitadu a nàrrere chi at a faeddare prima de Làtziu-Casteddu, trasferta difìtzile meda, in prus chi connoschet sa mentalidade de is sardos e ant a contare is fatos, non is faeddos Custu merie at a dirìgere su primu allenamentu.

Pro issu una torrada in Sardigna, bidu chi cun is ruju-blu at esordidu in Sèrie A in su 1982, in s’ùrtimu cuartu de ora in una gara in domo contra s’Inter. Pro issu a fine carriera in su ’93-’94 un’istajone cun sa Torres in Sèrie C2.

Sa sotziedade de su presidente Tommaso Giulini, at iscritu chi is caraterìsticas de su diretore tècnicu nou sunt: giogu propositivu, ardera e carisma.

S’isperat chi custas calidades bèngiant postas in pràtica, is àteras iscuadras no ant a istare a pompiare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22