Sa Natzionale Italiana de fùbalu at bìnchidu s’ùrtima partida amistosa contra sa Repùblica Tzeca, prima de su comintzu de sa manifestatzione de s’Europeu, chi s’at a abèrrere in is dies imbenientes.

Sa gara giogada a Bologna est acabbada bator a zeru pro is asulos, gràtzias a is gol de Immobile e Barella a su primu tempus, e is àteras retes marcadas dae Insigne e Berardi in su segundu tempus.

Is òmines de Mancini cun custu resurtadu e una partida giogada bene meda, ant dimostradu de tènnere gana e chi sunt prontos a fàghere una cumpetitzione bona aberu.

S’iscuadra at fatu bìdere bonas cosas in atacu, e at ispassiadu is tifosos cun bellas atziones de giogu. Sa difesa puru est dae partidas meda chi no est pighende prus gol.

Mèritu mannu est de s’allenadore marchigianu e ex giogadore famadu de sa Sampdoria, chi est resèssidu a costrùere una Natzionale chi solu solu duos annos a oe pariat impossìbile chi poderet otènnere custos resurtados e tènnere s’ambitzione de fàghere un’Europeu dae protagonista.

Tzertu sa gara de incomintzu de s’Europeu contra sa Turchia, chi s’at a giogare s’ùndighi de làmpadas, at a èssere un’àtera chistione. Prima de totu pro s’emotzione de s’eventu chi s’annu coladu est brincadu pro more de sa pesta de su Covid-19 e in prus contra is turcos no at a èssere un’isfida amistosa.

Bona sa prima partida in natzionale pro Raspadori: su giogadore de su Sassuolo at fatu bìdere chi est balente a beru e at a podere èssere una carta bona in prus pro Mancini.

Pro custu gióvanu, medas espertos de fùbalu sunt prontos a iscomìtere chi at a pòdere èssere su “Paolo Rossi” de su Mondiale de Ispagna 1982.

Ma mancari Raspadori apat fatu meda bene in custa istajone de Sèrie A, pro s’ora est mègius a non fàghere custos paragones cun sa bonànima de su campione chi est mancadu s’annu coladu. Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

S’aberint is ghennas de su càrtzere pro Giovanni Brusca, lòmpidu a fine pena.

S’òmine chi at prèmidu su telecumandu a Capaci e fatu iscagiare in s’àtzidu su piticu Giuseppe Di Matteo est, cun totu is cautelas previstas pro unu personàgiu che a issu, una persone lìbera.

Custu ispresonamentu, comente si podet immaginare, at iscasiddadu medas crìsticas de s’opinione pùblica.

Is familiares de is vìtimas aiant giai naradu su chi nde pensat s’annu coladu, cando est essia a campu su problema de pònnere in libertade unu criminale che a Brusca, apanigiadu “iscannacristianos”.

Tocat a nàrrere chi a Brusca, sende unu collaboradore de giustìtzia, sunt istados aplicados os benefìtzios previstos pro is pentidos definidos “afidàbiles”.

In su càrculu de is cundennas a càrrigu de Brusca, in totale is annos de iscontare arribbaiant a 26 – fiat istadu arrestadu in su 1996 -.

Ma sa cundenna s’est incurtzada ancora pro sa “bona cunduta” a pustis de chi a Brusca fiant istados cuntzèdidos unas cantas dies prèmiu de libertade.

Immoe però s’aberit unu casu complicadu de gestione de sa libertade de su capu e de is familiares suos. Is servìtzios de vigilàntzia, ma fintzas de protetziones prevìdidos dae sa lege, ant a dèvere tènnere contu de is medas delitos e de is istragos chi Brusca etotu at cunfessadu.

No at ammìtidu petzi de àere coordinadu is preparativos de s’istrage acanta sunt mortos Giovanni Falcone, sa mugere Francesca Morvillo e tres òmines de s’iscorta. At cunfessadu numerosos delitos in sa zona de San Giuseppe Jato. Ma prus che totu at ammìtidu is responsabilidades suas in su rapimentu e in sa morte de Giuseppe Di Matteo, su fìgiu de trèighi annos de su collaboradore Santino Di Matteo.

S’ispresonamentu de Brusca torrat a abèrrere una ferta dolorosa pro s’Itàlia, mancari is rivelatziones suas ant permìtidu de aviare medas protzedimentos chi ant fatu craresa in sa gosi mutida “tratativa” intre Istadu e màfia. Ma mancari prevìdida dae sa lege pro is collaboradores de giustìtzia, vistos is delitos malos de s’ex capu e su passadu suo, est una noa chi nemos diat àere bòlidu mai intèndere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”