A sa fine sa nave manna est istada liberada.

S’Ever Given, portacontainer chi dae belle una chida tapaiat su Canale de Suez, est istada in fines liberada.

Una nova importante pro su cummèrtziu globale, giai provadu in s’ùrtimu annu dae sa pandemia de su Covid-19.

S’imbarcatzione cun bandera taiwanesa, at serradu su Canale de Suez martis coladu, provochende su prus mannu atascu marìtimu de su mundu e causende graves pèrditas econòmicas.

Difatis in custa rota marìtima sa prus curtza tra Àsia e Europa, colat belle su 12% de su cummèrtziu globale e custu blocu at causadu un’aumentu de is prètzios de su petròliu in is mercados internatzionales, essende chi medas petrolieras sunt istadas custrintas a abbarrare firmas.

Su colossu de 221 mìgia tonnelladas e 400 metros de longària, eris est istada liberada cunsentende a is 370 imbarcatziones blocadas a s’intrada de su canale de sighire su biàgiu issoro.

Pro ispostare s’Ever Given cun su càrrigu suo de prus de 18.000 container ant partetzipadu ruspas, dragas e màchinas ispetziales pro marrare ludu e arena, chi ant donadu unu contributu mannu pro liberare sa carena de sa nave.

Non sunt mancados is rimorchiadores, 15, tra custos su “Carlo Magno” cun bandera italiana. Lòmpidu in su Mare Ruju a pustis de èssere partidu dae is Emirados Àrabos, at atiradu s’atentu de totus is giornalistas natzionales.

Si tratat de unu rimorchiatore de artura, longu prus de 55 metros e largu belle 16, fraigadu dae sa Rosetti Marino de Marina de Ravenna, chi cun is suas 200 tonnelladas a fortza trainante at donadu unu contributu fundamentale a s’abertura de su Canale.

Su cumpartu propulsivu podet erogare una potèntzia de bene 10.880 caddos, alimentados dae prus de 1.200 metros cubos de carburante chi podent èssere betados in is serbatojos.

In totu sunt 24 is òmines de s’echipàgiu chi serbint pro fàghere funtzionare custa locomotiva de su mare, intrada in servìtziu cun Augustea in su 2006.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

A dolu mannu Sant’Efis ocannu s’at a festare una die ebbia e in caminu no ddoe ant a èssere is fideles a dd’acumpangiare.

S’isolvimentu de sa promissa a su màrtire gherradore s’at a fàghere comente a s’annu coladu, pro more de s’apretu de su COVID-19.

Su Santu chi – segundu sa traditzione – at liberadu Casteddu dae sa pesta in su sèculu XVII, at a essire dae sa crèsia de Stampaxi sa die de sa festa de is traballadores – s’annu coladu dd’aiant istacadu su 3 de maju -.

Galu non s’ischit de cale colore at a èssere in cussas dies sa Sardigna, ma seguru sa protzessione fatu de is carrelas de Casteddu prenas de gente dae mangianu, chi fiamus acostumados a bìere, no ddoe at a èssere.

Is grupos – seberados – cun su bestire sardu de is biddas no ant a èssere presentes a sa festa prus manna famadas de Sardigna, e prus pagu is fideles de Sant’Efis pro dd’acumpagiare finas a Nora.

In custas dies s’est atopadu su sótziu provitziale pro s’órdine e sa seguresa, ghiadu dae su prefetu Gianfranco Tomeo, paris cun su Munsennore de Casteddu, su presidente de s’Artzicunfraria e in sìndigos de is biddas acanta s’ant a fàghere is tapas de sa protzessione – Casteddu, Pula, Cabuderra, Sarrocu e Santu Perdu -.

Totus ant cunfirmadu chi s’àndala chi s’at a sighire at a èssere sa pròpiu de s’annu coladu, de àtera manera no ddoe at modu de fàghere su tzerimoniale.

S’istàtua de Sant’Efis at èssere carrada a Nora in una vetura aberta, pro more chi sa gente potzat bìdere su santu colende dae is fentanas de is domos.

In su 2020 est istada impreada sa camioneta de sa Rughe Ruja ebbia – una Volkswagen modellu Amarok – pro iscolletare Sant’Efis in unu biàgiu técnicu chi est istada cambada pro permìtere de carrigare s’istàtua pro su pellegrinàgiu.

Sa gente at a pòdere bìdere in televisione sa protzessione cun màrtire cristianu acumpangiadu finas a su logu de su màrtiriu.

Sa die, totus is fideles ant a pedire torra a su Santu nàschidu in Antiòchia sa gràtzia pro s’acabbu de s’epidémia de su coronavirus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”