Sa Sardigna colat dae sa zona groga a su colore aràngiu. Ite càmbiat

Comente belle totu s’Itàlia, peri sa Sardigna intrat in zona colore de aràngiu.

Su guvernu at pigadu custa detzisione a pustis de s’aumentu de sa pertzentuale de su nùmeru de malàidos in is repartos de terapia intensiva de s’Ìsula, chi nche ant isciaddidu su lìmite de su 30%.

Mancari su datu RT, est a nàrrere su càrculu de s’ìnditze de riprodutzione de una maladia — esseret de su 0,95 e duncas prus bàsciu 1, s’isula est colada dae sa zona groga a cussa aràngiu.

Ma segundu s’ùrtimu Dpcm cun is mesura anti-Covid de su 14 ghennàrgiu, in sa zona aràngiu ite si podet fàghere e ite nono?

Sunt permìtidos is ispostamentos petzi a s’internu de su Comunu de residèntzia, dae is 5 a is 22. S’at a pòdere essire foras de su comunu de residèntzia o dae sa Regione pro apretu ebbia, pro traballu e pro motivu salude, e a ogna contu at a serbire semper s’autotzertificatzione. Abarrat sa proibitzione de essire a de note dae is 22 a is 5 de mangianeddu.

Est semper cunsentidu a contoniare a sa domo de residèntzia o domitzìliu. Dae su 16 de ghennàrgiu 2021 faghet a torrare fintzas a is segundas domos in intro e in foras de regione.

Pro is bìsitas a amigos o parentes, in àrea aràngiu est cunsentidu, una bia a sa die ebbia, a andare in un’àtera domo privada abitada de su matessi Comunu, tra is 5 de mangianu e is 22 de note, màssimu duas persones, prus cussas giai cunviventes in sa domo de arribu. A ogna modu sa persone o is duas persones chi si tràmudant s’ant a pòdere leare fatu is fìgios prus piticos de 14 annos e is persones cun disabilidade o no autosufitzientes chi bivent paris cun issos.

Pro chie bivet in comunos chi tenet finas a 5.000 abitantes est cunsentidu a s’ispostare, tra is 5 e is 22, intro is 30 km dae sa làcana de su Comunu, peri pro fàghere bìsita a amigos o parentes in is modalidades giai descritas, cun sa proibitzione però de s’iscostiare cara a is cabu-logos de Provìntzia.

Tzilleris e ristorantes podent abèrrere solu pro fàghere servìtziu de asportu o cunsigna a domitzìliu.

Su servìtziu de abertura a su pùblicu de is museos e de is àteros istitutos e logos de sa cultura est suspèndidu, francu pro is bibliotecas chi podent fàghere servìtziu de prèstidu de is libros cun prenotatzione. Abarrant serradas palestras e piscinas. A livellu individuale si podet fàghere atividade fìsica, su pròpiu allenamentos pro isport de iscuadra, chi s’ant a pòdere fàghere in forma individuale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu no est renèssidu a iscansare sa de sete partidas pèrdidas. At bìnchidu su Milan.
In sa Sardinia Arena est acabbada 0-2 pro is ruju-nieddos cun totus is gol realizados dae Zlatan Ibrahimovic.
A is ruju-nieddos ddis serbiant puntos pro abarrare primos solos in classìfica, torrende∙si a istesiare dae s’Inter, e ant meritadu de bìnchere pro sa gana dimustrada.
Su primu gol de su Milan est lòmpidu a su cumentzu dae sa gara – 6′ minutu de su primu tempus – gràtzias a unu rigore assignadu dae s’àrbitru Abisso, pro more de una farta – pagu crara — de Lykogiannis a dannu de de Ibrahimovic. A pustis, su giogadore isvedesu etotu, dd’at trasformadu ispiatzende s’ùrtimu òmine de su Casteddu Alessio Cragno.
Su Casteddu no est renèssidu a adderetare su risultadu, e pro totu sa primu parte de sa partida no est lòmpidu a sa porta de is aversàrios. Antzis est istadu su Milan a s’acostiare a sa rete, cun duas caladas de pee dae largu de su tertzinu Davide Calabria — in unu at fertu su palu -.
Pròpiu su difensore milanesu, in is primos minutos de su segundu tempus, at passadu sa botza a su cumpàngiu Ibrahimovic pro sa rete de su 2-0.
A pustis is ruju-blu ant proadu a marcare unu gol cun s’argentinu Simeone, chi est istadu firmadu cun una bella parada dae su portieri aversàriu Donnarumma.
Ma su Milan no est abarradu a castiare: semper Ibrahimovic – su protagonista de sa partida – no est resèssidu a fàghere un’àtera rete solu gràtzias a unu miràculu de Cragno.
Mancari s’iscuadra de Stefano Pioli siat abarrada in deghe a pustis chi s’àrbitru nch’at bogadu a foras de su campu su tzentrucampista Alexis Saelemaekers cun su cartellinu ruju, is casteddajos non sunt resèssidos a mudare sa sorte de sa gara.
Tzertu a is òmines de Eusebio di Francesco mancat unu rigore pro sa farta de Brahim Diaz subra Riccardo Sottil, ma at fatu tropu pagu a beru pro paregiare sa partida.
Immoe a pustis de custu risultadu, sa banchita de s’allenadore abrutzesu est semper prus in arriscu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”