Dae sa tecnologia arribbat un’agiudu a s’Itàlia pro atremenare s’ispartzinamentu de s’epidèmia de su COVID-19.

Si tratat de un’aplicatzione chi est istada isvilupada dae sa domo de isvilupu milanesa Bending Spoons, chi at firmadu cun su Guvernu unu cuntratu chi previdet sa làssida a s’indonu de sa lissèntzia de impreu.

In tempus de crisi econòmica, tocat a ddu pònnere bene a notu, chi s’Istadu no at a ispèndere unu francu.

Immuni – custu su nùmene de s’aplicatzione – at a serbire a su Guvernu pro portare a pòmpiu e tratzare is personas malàidas de Covid-19. Custos datos ant a serbire pro fàghere partire cantu prima sa Fase 2. Sa noa s’est difùndida pro mèdiu de una nota publicada dae su Cummissàriu Arcuri.

Non sunt istadas galu iscoviadas is caraterìsticas de s’app, fintzas si si pensat chi su mètodu impreadu diat dèpere èssere cussu de su tratzamentu de is cuntatos pro mèdiu de su Bluetooth.

Unu sistema cunsideradu seguru e fidadu, fintzas pro un’aspetu importante: sa privadesa. A pitzu de sa pròpiu cosa diant dèpere èssere traballende fintzas Apple e Google pro more de cuncordare in pagu tempus un’agiornamentu de su programma pro Android e iOS chi ìntegret is trastos pro su tratzamentu de is cuntagiados.

Immuni at a permìtere de poderare sa rasta de is cuntatos tentos dae una persone: s’in casu resurtet cuntagiata, totus is chi ant tentu ite fàghere dae presu cun issa ant a èssere avertidos.

S’avisu at a arribbare isceti a is persones chi ant installadu s’app – chi no est obrigatòria – e podet èssere iscarrigada in manera voluntària dae totus.

Su Ministeru de s’innovatzione tecnològica e de sa digitalizatzione, at craridu chi pro funtzionare tocat chi siat installada nessi dae su 60% de sa populatzione.

Immuni diat permìtere de isulare eventuales printzìpios de ispàinu de su virus e poderare sa situatzione suta controllu, atremenende su virus. S’aplicativu at bintu sa cramada de su Ministeru de s’innovatzione tecnològica e de sa digitalizatzione pro agatare sistemas pro cuntrastare su coronavirus. Est resurtadu su mègius progetu tra is 318 arribbados in pagas dies e valutados dae s’iscuadra posta aparitzada dae su Ministeru.

S’aplicatzione est istada isvilupada cun sa collaboratzione de su Tzentru mèdicu Santagostino, espertu in sa digitalizatzione in campu sanitàriu.

Su sistema diat dèpere èssere disponìbile tra pagu tempus, a pustis de unu perìudu de proa pro controllare sa presèntzia de possìbiles problemas tècnicos.

Immuni s’at a pòdere iscarrigada diretamente de su Google Play Store e App Store.

Est un’arrèschida istórica cussa de sa cunsigna de is telefoneddos intelligentes in su mese coladu.

Difatis, segundu is datos donados dae sa sotziedade Strategy Analytics, a freàrgiu su mercadu de su tzellulare est caladu de su 38%.

Totu pro more de s’epidèmia de su coronavirus chi at fatu rùere a terra su cumèrtziu de custu ramu.

Su primu chi est nd’est caladu est istadu su mercadu tzinesu, cun medas butegas e fàbbricas de tèlefoneddos intelligentes cungiados. A sighire est tocadu a is àteras natziones asiàticas e a pustis a is europeas, cumpresa s’Itàlia.

Immoe is bisòngios de sa gente sunt diferentes de cussos is meses colados, pro ite totus sunt timende pro sa vida issoro e pro sa crisi econòmica chi nd’at a bènnere.

Custu fenòmenu dd’amus a pòdere paragonare a is tempos de sa Segunda Gherra Mundiale.

Tzertamente a influire meda in sa calada de is bèndidas de is aparitzos telefònicos sunt istadas is limitatziones impostas a sa populatzione in medas istados de su mundu.

Peus ant èssere is datos de sa còmpora de is telelèfoneddos intelligentes in is meses benentes pro ite sunt istadas aumentadas is limitatziones.

Difatis, comente in Itàlia, pro evitare s’ispàinu de su cuntàgiu de su coronavirus faghet a essire dae domo pro motivu de traballu, de salude o de netzessidade ebbia.

Mancari su telefoneddu oramai siat un’ogetu chi non si nde podet prus fàghere a mancu, immoe non nch’est prus su disìgiu de tènnere s’ùrtimu modellu. A livellu planetàriu s’est frimada puru sa crèschida de su mercadu de is tzellulares impreados e cussos ricunditzionados o rigenerados.

Una categoria chi fiat sighende a crèschere in is ùltimos annos, sende ca podiant èssere cumertzializados peri in canales segundàrios.

Sa crisi de su mercadu mundiale de is telèfonos intelligentes usados est su sinnu de is tempos istragosos chi amus a colare. S’ispera, pro su bene de totus, est chi in is annos chi benint s’economia si potzat torrare a istantargiare .