Tribulia in Narcao:derruet sa copertura de una domo, morit unu bezzu de 80 annos.

Una tribulia grae at iscuttinadu a sero sa comunidade de Narcao, in su Sulcis, inube un’omine de 80 annos, Alfonso Fanutza, at perdidu sa vida
pustis de sa derruta de sa copertura de sa domo sua. Secundu cantru est bessidu a pizzu, su bezzu si fuit apperricadu supra sa copertura de sa domo pro controllare de pessona sa presentzia de unu istampu chi dae tempus faghiat bintrare s’abba intro de sa domo. Unu controllu chi s’omine, mancari tenzeret 80 annos, aiat dezisu de faghere a sa sola. In su mentres de su controllu, po motivos chi sunt ancora de accrarare, una parte de sa copertura at tzedidu, faghindelu ruere in su boidu.

Sa derruta lu at ingullidu e s’omine est ruttu intro de sa domo dae casi battoro metros. Su corpu est bistadu bisesstrante e li at cajonadu fertas graes meda. Mancari custu, po divressos minutos nissunu si est abbizzadu de cantu fuit sutzessu. A iscoperrere sa tribulia est bistadu unu parente chi, passadu pagu tempus,bidu chi su bezzu non si bidiat , at dezididu de controllare sa domo. Una borta bintradu, si est acciappidu in daenanti un’iscena drammatiga e at giammadu sos succursos.

In su logu de sa tribulia sunt arrivados in presse meda sos de sa politzia locale, sos carabbinneris e sos de su 118. Sos duttores ant tentadu de li dare sos primos succursos, ma sa cunditziones de s’omine de 80 annos sunt appareschidas disisperadas. A dolu mannu, mancari eppant tentadu de lu salvare, donzi cosa no est serbida a nudda e s’omine est mortu.

Sos carabbinneris ant fattu partire sos atzertamentos po cumprendere menzus itte potat essere sutzessu e biere si bi sunt responsabilidades. Sa zura est bistada posta in sicuresa po faghere sos cabbales e balutare sas cundissiones de sa domo. Non si podet escluire chi sa copertura esseret giai avariada dae su tempus malu e dae s’abba chi fuit bintrada chi aiat illaunidu ca copertura.

Su nuntzu si est isparghidu in presse in sa bidda. Alfonso Fanutza fuit connoschidu meda e fuit istimadu in sa comunidade locale e in medas si sunt affissacos a sa famiglia corpada dae una tribulia gai dolorosa.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22