Su fenomenu de sos mangones in s’istagnu de Molentargius: un’ispettaculu naturale in su coro de sa tzittade.

S’istagnu de Molentargius, intre Casteddu e Quartu S. Elena, offerret unu de sos ispettaculos prus ammaghiantes de sa Sardigna cun sa presentzia regulare de sos mangones arrubios. Custos puzzones galanos, chi faghent parte de sa zenia Phoenicopterus roseus, sunt attirados dae sas abbas calmas e salamattas de sa zura, chi offerrint cundissiones ideales po los faghere pappare e faghere sos nios. Su Parcu Naturale Regionale de Molentargius-Saline, chi est mannu casi 1.600 ettaros e cumprendet istagnos, abba e salinas istoricas, est bistadu fattu po tutelare custu eco-sistema unigu, reconnoschidu a livellu internatzionale dae su Protocollo de Ramsar.

Sos mangones arribant donz’annu dae zuras divressas de su Mediterraneu, comente Francia,Spagna e nord Africa, e acciappant in Molentargius unu furriadorzu seguru gratzias a sas abbas bassas, riccas de cosa de pappare e paza marina, e a sa trancuillidade de s’ambiente. Dae su 1993, sa zura est divennida fintzas unu logu po faghere sos nios: donzi beranu sas cropas, fraigant nios de fangu, ponent sos ovos e creschent sos puzzoneddos, dande vida a unu fenomenu de biodiversidade ispettaculare.

Su tempus massimu de appellida andat dae martu a triulas, cando sos puzzoneddos naschent cun pinnammene ferulattu e sos mannos si movent tottu imparis, pappande e comunicande intre issos, creande una bera “nue arrubia” chi si biet dae attesu meda. Pro diffendere sas niadas, su Parcu controllat su livellu de s’abba e alindat s’intrada a carchi zura, garantinde gai sa trancuillidade chi serbit a sos puzzones. Fintzas fora de s’istajone sessuale, sos mangones  addurant a s’ispissu in s’istagnu o in sas zuras umidas accanta, comente s’istagnu de Santa Gilla, offerrinde un’ispettaculu unigu con sos bolos elegantes insoro e accumpanzados dae atteras zenias de puzzones de s’abba, intre sos cales mengones,tzurullios, filippas e anadras.

Sa presentzia de sos mangones in Molentargius, ets unu esempru craru de bivere imparis intre natura e tzittade, mustrande comente un’eco-sistema delicadu potat esistire a pagos passos dae su tzentru de sa tzittade. Custu fenomenu naturale no est solu un’occasione po su birdwatching, ma fintzas un’indittu de sa puresa de sas abbas e de sa calidade de s’habitat, cuffirmande s’importantzia de tutelare e balorizzare sas zuras umidas sardas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Sa Sardigna s’impignat contra sa cuncentrassione de sos 41-bis in s’isula.

Sa Sardigna si ammaniat a un’impignu populare contra sa detzisione de su Guvernu de destinare a s’isula tres de sas sette presones italianas riservadas solu a sa manera de su 41-bis, cussos de Uta, Bancali e Badu e’ Carros. Unu seperu chi at azzesu su cunfrontu politicu e istitutzionale e chi benit cussideradu irmasionadu in cunfrontu a su restu de s’iscrocca natzionale.

Sa bogada a campu si prevedit po sapadu 28 de frearzu in Casteddu. A la poderare est sa presidente de sa Regione Alessandra Todde impare a sos sindigos de sas iscroccas interessadas, assotzios e tzittadinos.S’initziativa si presentat comente un’appellu mannu e rucradittu chi puntat a binchere sas pertoccas politicas e ponnere impare tottu sa comunidade sarda.

A su tzentru de sa cuntestassione non bi est sa lutta a sa criminalidade ordiminzada ne sa balididade de su 41-bis. Sa critica est po s’ispartidura de sas presones de massima sicuresa supra s’iscrocca natzionale. Secundu sa Regione, assinzare a sa Sardigna casi sa metade de sas presones chi si prenettant est una detzisione demasiada, leada chentza unu cunfrontu de faghere prima e chentza una balutazione pubbrica de sos corpos sotziales, accolomicos e de s’iscrocca.

In su documentu, ispartu dae s’amministratzione regionale si evidentziat chi pustis de deghinas de annos sinzados dae su pesu de sas teracchias militares, s’isula arriscat de deppere accomettare cussa chi benit deffinida sa teracchia nova de sas presones. Un’afficcu chi, secundu sos chi ant ordiminzadu s’initziativa, diat podere gravare supra iscroccas giai debiles.

Un’atteru elementu de affuscu est po su possibile tramudu de sos presoneris sardos in su Continente, creande problemas a sas familias e a sos ligamenes affettivos. Sa Presidente Todde aiat giai espressadu a su Ministru Nordio s’arrealia de sa Regione nande chi sa Sardigna non si podet revertire in sa Cayenna de s’Italia. Sa detzisione ets bistada pustis formalizzada in su mese de Nadale in sa cunferentzia Istadu-Regiones, coladorzu chi secundu s’amministratzione regionale non
diat aere rispettadu de su tottu su printzipiu de leale collaborassione chi est prenattadu po sas autonomias ispetziales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22