Casteddu e Davide Nicola, s’adiosu est uffitziale. Su club saludat su tennicu pustis sa salvesa in Serie A.

Davide Nicola no at essere pius s’allenadore de su Casteddu. Pustis de chidas de boghes, indiscressiones e isettos, su club ruju e blu at comunicadu po mesu de una noda uffitziale s’ispitzigu dae su tennicu chi at ghiadu s’isquadra a sa salvesa in s’istagione chi est appena finida. Un’inserru rispettosu, carrigu de riconnoschentzia, chi decretat sa fine de unu caminu curtzu ma de signifficu.

Davide Nicola fuit arrivadu in Casteddu in d’unu momentu cumplicadu de s’istagione, cando s’isquadra pariat irmarrida e sos risurtados fadicaiant a arribare. Cun sa manera sua reale, sa leadership muda sua ma dezisa e un’impostadura de su pianu affortigadu, est resessidu a torrare a dare ecchilibriu a una truma chi pariat aere perdidu cunfiantza e cumpattesa.

Sa salvesa, conchistada cun fatiga e determinu, est bistada su fruttu de unu tribagliu forrogosu, fraigadu die pustis die, allenamentu pustis allenamentu, semper cun s’intentu de torrare dignidade e ispiritu chertadore a s’isquadra.

Nicola at ischidu fraigare unu ligonzu sincheru cun sos giogadores e cun s’ambiente, conchistande puru s’istima de sos tiffosos, chi in pius de un’occasione ant bogadu a campu s’appretziamentu propriu po s’impignu suo e sa capatzidade sua de resonare sos giogadores in sos momentos pius diffitziles. Mancari no esserat omine de nuntzios mannos, at ischidu trasmittire una mentalidade forte, fundada supra su sacrifitziu, organissasione e s’idea chi nissuna partida siat mai perdida a s’incumintzu.

S’esperientzia sua si est iscopiada de determinu: no est unu casu si su nomene suo est como assotziadu a remontas chi no si isperaiant e a salvesas chi parent andare addia de donzi logiga. Pustis de aere dassadu su signu a Crotone, Torino e Salerno, fintzas s’avventura in Casteddu si azzunghet a sa lista de sas porfias binchidas, cunfirmandelu comente unu de sos allenadores pius fidantziosos e rispettados de sa bista de su fubbalu italianu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Energia, creschet s’ispesa pro impresas e famìllias sardas

Sas impresas e sas famìllias sardas sunt sighende a fàghere sos contos cun una depressione energètica chi, nointames de sos primos signales de rallentamentu, paret ancora resistente meda.

Su pesu de sas bulletas abarrat artu meda e nch’est ancora a tesu sa normalidade de sos prètzios de in anti de sa crisi. S’energia abarrat unu de sos fatores chi pesant de prus subra de sa solididade econòmica de sa Sardigna, cunditzionende non sa cumpetitividade de sas aziendas ebbia, ma finas sa calidade de sa vida de sa gente.

Sas impresas piticas e medianas de s’ìsula ant tentu un’ispesa in prus de 77 milliones de èuros (prus o mancu) causada dae s’energia incarida. Unu nùmeru importante chi ponet frenos a sas intradas, ponet barrancos a sos investimentos e bortas meda non permitit sa pianificatzione de sa crèschida. Finas pro sas famìllias sardas sa situatzione abarrat dificultosa. Sos prètzios pro s’impreu de s’elètricu e de su gas in paragone a su 2021sunt prus artos de su 42,3%.

Su cunfrontu cun situatziones europeas prus o mancu che pare ponet in evidèntzia comente a sas impresas sardas piticas e medianas lis tocat de parare fronte a una diferèntzia cumpetitiva carculada in 14 milliones de èuros. S’energia duncas est est una de sas isfidas prus importantes pro s’isvilupu econòmicu de s’ìsula. A minimare su càrrigu fiscale in sas bulletas, faghende finas interventos mirados pro fàghere crèschere sa resa energètica e s’auto-produtzione, podet dare un’agiudu pro chi su benidore de sas impresas e de sas famìllias sardas si potzat suportare mègius.

Su de passare a fontes rinnovàbiles e su de megiorare sos consumos sunt trastes primàrios pro minimare sa dipendèntzia dae sos mercados de fora e pro trasformare s’ispesa pro s’energia in una possibilidade de crèschida, cumpetitividade e annoamentu. In una situatzione econòmica globale pagu segura, a moderare s’ispesa energètica est indispensàbile pro dare istabilidade a sas aziendas, pro agiuare sa gente e pro s’isvilupu sostenìbile de sa Sardigna intrea.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”