Triunfu pulidu e meridadu po sa zovana atleta casteddaja Giorgia Medde, chi est divennida campionessa europea in sa classe Techno 293, una de sas pius de importu truppas zovaniles de su windsurf internatzionale. Sa cumpetissione si est fatta in Ostia, inube Medde at dominadu su campu de porfia, binchinde deghe de sas undighi proas chi at fattu e dassande su signu in d’una edissione de su campionadu chi at essere ammentada po sa superioresa tennica e mentale sua.

Fintzas dae sos primos momentos, s’atleta sarda at mustradu de essere in d’una forma eccetzionale, cumandande sa classifica e addurande a su primu logu po tottu sa durada de sa manifestassione.

Sas cundiziones de su tempus chi cambiaiant a s’ispissu non ant iscarfidu sa cuncentratzione sua: Medde si est accunnortada a donzi cambiu de su bentu, remoninde cun siguresa puru sos momentos pius diffitziles e cumplicados de sas porfias.Sa capatzidade sua de lezere su campu, accaputzada a una ammaniada atletica de livellu artu, li at permittidu de dassare in daesegus meda sas atteras, meda de sas cales arribaiant dae nassiones chi sunt semper bistadas fortes meda in sa bista velica.

Su resurtadu alcansadu in Ostia est un’umiadroxiu de grandesa no solu po s’atleta zovana, ma fintzas po tottu su movimentu de sa vela italiana e, in manera particulare, po sa Sardigna, terra ligada a su mare e sa vela in manera funguda. Creschida isportivamente in sas abbas de su sud de s’isula, Giorgia Medde at ischidu isposare talentu naturale, dedissione e ispiritu de cumpetissione, beninde a pizu comente una de sas promissas pius lughentes de su windsurf natzionale.

Sa classe Techno 293, connoschida a livellu internatzionale comente base po frommare sos zovanos chi faghent windsurf, est a s’ispissu cunsiderada sa gianna de bintrada deretta a sas categorias olimpicas. Sa bittoria de Medde, tenet duncas unu signifficu fintzas pius importante, ghettandela a banda de risurtados isportivos de livellu semper pius artu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Missile ruttu in mare in Sardigna: operassiones de recuberu prenettadas po Mesaustu.

Unu missile Aster 30, bissinu, est ruttu in mare su mese de maju passadu allargu de sa costa orientale de sa Sardigna, intre Arbatax e Tertenia. Su coette, affiladu in su mentres de una esercitatzione militare in s’operassione Joint Stars 2025, no est arrivadu a su logu chi si prevediat e est affundadu in mare , a casi 600 metros de fundaria.

Mancari s’incidente siat de parizzos meses, sas operassiones de recuberu si prevedint solu po Mesaustu, sarbu cambiamentos de s’urtimu momentu. Si pensat puru de faghere iscoppiare su missile in su fundu de su mare, unu seperu chi diat podere faghere bessire a pizu atteras polemicas ligadas a problemas po s’ambiente.

Su missile, chi faghet parte de sa defensa aerea Samp-T, torraiat dae una finghidura chi cumprendiat sa risposta a unu presumibbile attaccu cun sos missiles contra sa tzittade de Casteddu. Su casu, cunsideradu dae sa Defensa commente un’abbenimentu tennicu remonibile, at duncas torradu a azzendere sa cuntierra supra su chi cheret narrere po sas esercitztaziones militares in Sardigna, mescamente in d’una iscrocca inube zuras mannas in terra e in mare sunt proibbidas dae annos po motivos de gherra.

Pustis de sa rutta de su missile, su 3 de lampadas passadu, s’Uffitziu marittimu de Arbatax aiat bogadu un’avvisu de attentzione po sos chi andaiant in mare, accumentande de si tennere a una distantzia de pius de 150 metros dae su puntu inue su missile est ruttu.

Su casu de s’Aster 30 no est isoladu. In su mattessi tempus, un’atteru missile, unu Stinger a raju curtzu, diat essere andadu isperdidu in sa zura de sa plaja de Murtas. A custu momentu, peroe, non si prevedint operassiones de recuberu po cust’urtimu.

Su ritardu in sos interventos e sa mancantzia de comunicassiones uffitziales lestras, sustentant sos pensamentos de sas comunidades locales e de sos assotzios ambientales.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22