Sas plajas pius connoschidas de sa Sardigna: Paradisos de sognu in su coro de su Mediterraneu.

Sa Sardigna est unu de sos sognos pius disizados de su Mediterraneu, tzelebre po sas abbas cristallinas suas, sa rena bianca meda e sas bistas che che bogant s’alenu. Cun pius de 1.800 kilometros de costa, s’isula bantat medas de sas plajas pius bellas e famadas de s’Italia, a s’ispissu cumparadas a cussas de sos Caraibi. Iscoperrimos impare sas pius conas.

Sa Pelosa – Stintino(SS)

Una bera e propia cona de sa Sardigna, Sa Pelosa est famada po sa rena fine e bianca meda sua e sas abbas biaittas e pagu fungudas. Posta in sa
punta nord-occidentale de s’isula, est amparada dae un’argine naturale formadu dae s’isula Piana e da S’Asinara, chi la rendent perfetta fintzas in sas dies de bentu.

Cala Mariolu – Baunei (OG)

In su coro de su Gulfu de Orosei, Cala Mariolu est accantzaditza solu  passande in mare o po mesu de camineras in mesu de sos montes. Sa plaja est fatta cun pedras biancas e rosa, cun d’unu mare chi cambiat dae su blau fungudu a su biaittu lughente. Modellu po sos amantiosos de su “snorkeling” e de sa natura agreste.

Cala Goloritzè – Baunei (OG)

Patrimoniu de s’UNESCO, Cala Goloritzè est un’angulu pitticcu de paradisu chi si podet accantzaditzare solu a pe cun d’una ora e mesu de caminu oppuru in barca. Distinta dae un’arcu naturale e dae un’ aguglia de pedra ‘e carchina arta 143 metros, est unu de sos logos pius fottograffados de Sardigna.

Plaja de Tuerredda – Teulada (SU)

Intre sas pius amadas de sa Sardigna tzentru meridionale, Tuerredda est posta in mesu de Capo Malfatano e Capo Spartivento. Su mare trasparente e sos fundos de rena suos ammentant su mare de sos Tropici. A s’isuledda in daenanti a s’atta ‘e mare si podet arribare nadande, rendinde s’esperientzia fintzas pius  ammaghiante.

Costa rei – Muravera (SU)

Cun pius de 8 kilometros de costa, Costa Rei est perfetta po sas famiglias e chie chircat relax. Sas plajas camposas e prenas de rena suas, comente Cala Sinzias e Santa Giusta(famada po su”Roccarzu de sa Peppina”, apparant abbas calmas e cristallinas, modellu fintzas po sos pitzinnos.

Attività realizzata col contributo della Regione Sardegna — IMPRENTAS 2024-2025

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22