Sardigna: tres resones po sas cales est connoschida in tottu su mundu
No est solu unu logu de vacantzias: est unu logu chi affadat, ispirat e suprit po s’identidade sua forte e unica. Ma cale sunt sas tres resones printzipales po sas cales sa Sardigna est famada in tottu su mundu.
canale WhatsApp
Sardigna: tres resones po sas cales est connoschida in tottu su mundu.
Sa Sardigna est una de sas pius ammaghiantes isulas de su Mediterraneu e, in su tempus, at conchistadu unu logu ispetziale in s’immazinariu internatzionale de totta sa zente. No est solu unu logu de vacantzias: est unu logu chi affadat, ispirat e suprit po s’identidade sua forte e unica. Ma cale sunt sas tres resones printzipales po sas cales sa Sardigna est famada in tottu su mundu.
Su mare e sas plajas de sognu.
Sa prima cosa chi bessit a pizu pensande a sa Sardigna est chena duda peruna su mare sou cristallinu. Abbas biaittas, trasparentes, plajas biancas e illimpiadas: s’isula bantat calicuna de sas costas pius bellas de su mundu,chi si podent cumparare a cussas de sos Caraibi. Dae sa costa Ismeralda a sas baias pitticcas e agrestes de s’Ozzastra, donzi angulu apparat bistas chi che bogant s’alenu e unu mare premiadu donz’annu po sa calidade de sas abbas suas. Custu patrimoniu naturale attirat miliones de turistas, accasande vip internatzionales, chi seperant sa Sardigna po sa bellesa sua bertera.
S’istoria millenaria e sos misterios de sos nuraghes.
Sa Sardigna est puru una terra ricca meda de istoria e archeologia. Sa cona pius nodida sunt sos nuraghes, fraigos antigos de pedra unicos in su mundu, chi contant una tzivilidade prena de misteru chi si est isviluppada pius de 3.000 annos faghede. Cun pius de 7.000 nuraghes ispartos in s’isula, sa Sardigna est unu beru e propiu museu a chelu abbertu. Accanta a sos nuraghes, bi sunt domus de janas, puttos sacros, tumbas de tzigantes: monumentos ammaghiantes chi sighint a attirare istudiosos e biazadores curiosos.
Sa cultura, su connottu e sa vida longa.Sa terza resone est s’identidade culturale: forte, biva, bragosa.
Limba,musica, bistires de su connottu, ballos e festas populares faghent parte de s’abesu de medas biddas sardas. Sa Sardigna est fintzas connoschida po sa genuinidade de sa cosa de pappare, sos ritimos lentos e su sentidu de comunidade forte meda, elementos chi dant unu contribbudu a unu fenomenu unicu: sa vida longa desamplada de sos abitantes suos.
Attività realizzata col contributo della Regione Sardegna — IMPRENTAS 2024-2025. LR 22/2018, art. 22
© RIPRODUZIONE RISERVATA
“Su Nenniri”, s’antigu connottu sardu chi abbisat sa Pasca
Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.
canale WhatsApp
“Su Nenniri”, s’antigu connottu sardu chi abbisat sa Pasca.
Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.
Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.
In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.
“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.
Attività realizzata col contributo della Regione Sardegna — IMPRENTAS 2025-2026. LR 22/2018, art. 22
© RIPRODUZIONE RISERVATA
