Sos tres nuraghes prus famados de Sardigna: biazu in su coro de sa tzivilidade nuragica.

Intre sos casi 7.000 nuraghes ispartos in tottu s’isula, bi nde sunt tres chi brillant po importantzia istorica, costoidura e balore de cobertantza.

Su Nuraxi de Barumini

Pasidu in sa zura de sa Marmilla, in su sud de sa Sardigna, Su Nuraxi de Barumini est su nuraghe pius famadu de s’isula e s’unicu chi est bistadu postu in sa lista de su Patrimoniu de s’Umanidade de s’UNESCO. Irfossadu in sos annos ’50 dae s’archeologo Giuanne Lilliu, su cumplessu est fattu dae una turre tzentrale arta casi 18 metros, arrogliada dae un’assentu  de turres pius pitticcas unidas dae unu bastione e unu populadu ispabinu. Est unu logu de fentomu po chie cheret cumprendere sa cumplessidade e sa delicadesa de custa cultura.

Nuraghe Santu Antine

In su coro de su Logudoro, in sa parina de Turalva(Provintzia de Tattari), naschet unu de sos nuraghes pius mannos e maestosu de s’isula:Santu Antine, connoschidu comente “sa domo de su Re”. Custu nuraghe monumentale, fraigadu cun coronzos de preda molina niedda, tenet una turre tzentrale chi prima codiaiat sos 20 metros de artaria, oe cusservada casi a 17 metros. A inghiriu de sa turre printzipale s’isfroscat un’assentu reffinadu de passadizzos, iscalas internas, e turres segundarias chi nde testimonzant sa funtzione siat de defensa chi regale.

Nuraghe Losa

In sa regione de su Guilcer, accanta a Abbasanta, si acciappat s’emossionante Nuraghe Losa, unu de sos menzus allogados de s’isula intrea. Sa jura sua casi a forma de coro e sa perfessione de sa muradura in roglios de perda molina, lu rendent unu de sos nuraghes pius galanosos e ammaghiantes. Fraigadu intre su seculu XIV e su Seculu XII a. C., Losa si annodittat po s’ecchilibriu de sas proportziones suas e sa cumplessidade de sa parte interna, chi incluirint iscalas, apposentos e coladorzos chi che leant a sa cuccurentzia. Su nuraghe est arrogliadu dae unu populadu, unu campusantu e piccus Punicos e Romanos, mustrande una continuidade longa de impittu de su situ puru in sos seculos imbenientes.

Attività realizzata col contributo della Regione Sardegna — IMPRENTAS 2024-2025. LR 22/2018, art

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22