Sanremo archiviadu cun suddisfassione, sa Sardigna bragosa de Mahmood e Geppi Cucciari chi ant fattu sa differentzia supra su cataffale.

Cust’annu, su cataffale de s’Ariston at bidu lughere duos talentos sardos chi ant accostadu Carlo Conti in sa conduizione: Geppi Cucciari e Mahmood. Sa presentzia de Geppi Cucciari at azzuntu unu toccu de dillezu e intelligentzia chi non si podent frimmare, calidades chi l’ant semper distinguida. In su mentres de sas chimbe dies de su Festival, Geppi at ischidu tennere arta meda s’attentzione de su pubbricu, bogandeche scraccaglios cun sas tirada suas chi punghent ma non sunt mai fora de logu. Sa capatzidade sua de improvvisare e sa grandesa naturale sua ant creadu unu momentu lezeru e alligru, faghinde divennere donzi interventu suo un’ispettaculu intro s’ispettaculu.

Accanta a issa, Mahmood, po sa prima borta commente co-conduidore, at ispantadu tottus po s’elegantzia sua e fintzas po sa presentzia iscenica. Giai binchidore de duas edissiones de su Festival commente cantante, Mahmood at mustradu un’attera parte de su talentu suo, resessinde a sbaghillai cun disgaggiu intre sos momentos de conduissione e sa musica. Sa boghe sua carda e chi imboligat at acciappidu logu fintzas in carchi bessida chi at emossionadu meda, donande a su pubbricu momentos de maghia pura.

Sa sintonia de sos tres conduidores si est bida fintzas dae su primu sero, creande un’ecchilibriu perfettu intre sa professionalidade de Carlo Conti, sas brullas prenas de delicadesa de Cucciari e s’ammaju de su tempus de oe de Mahmood. Imparis, ant dadu vida a unu Festival attivu, modernu e a su mattessi tempus rispettosu de su connottu sanremesu.

In pius de sa gara de cantones, chi commente semper at bidu sa partetzipassione de sos numenes pius mannos de sa cantone italiana, s’abbenimentu est bistadu arricchidu dae istranzos de grandesa e momentos de ispettaculu chi non si ant a podere ismentigare.

In manera particulare affriscionosu est bistadu s’interventu de Roberto Benigni, chi at abbertu sa serana finale cun d’unu discursu dedicadu a sa bellesa de sa musica e a sa fortza de s’arte po assortire sas pessonas. Su culiminzu de su Festival est arrivadu sapadu sero, cando, pustis de una chida de emossiones, su cantante Olly est bistadu nomenadu binchidore de Sanremo 2025. Cun sa cantone cadria e chi appassionat sua, at ischidu conchistare su coro de su pubbricu e de sa critiga.

Sa binchida de Olly, sa performance de Geppi Cucciari e Mahmood e s’elegantzia chentza tempus de Carlo Conti, ant rendidu custa edissione una cosa chi non si podet ismentigare.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22