Domos de sos istudiantes in Casteddu: affungu, umididade e discumbenios. Sos istudiantes denuntziant sa situassione.

Sa conditzione de sas domos de sos istudiantes de Casteddu, guvernadas dae s’ERSU, est a su tzentru de sas denuntzias de sos istudiantes de s’Universidade, chi faghent parte de s’Assotziu UniCaralis. Sa situassione, secundu cantu signaladu, est attesu meda dae sos modellos de vivibilidade agualados, creande difficultades meda chi impedint su dirittu a s’istudiu.

Sa disponibilidade de alloggios in sas domos destinadas a sos istudiantes est meda minimada. Solu una de sas chimbe domos de sos istudiantes est funtzionande, cussa de su Viale La Playa, mentres in cussa de sa bia Businco, sunt a disposissione tres pianos supra de chimbe.

Custa situassione at minimadu meda su numeru de sos lettos chi si podent usare, costringhinde paritzos istudiantes a si bortare a su mercadu privadu, faghinde creschere sos pretzios po sas familias insoro. Sas domos abertas, in pius, tenent problemas a s’istruttura e de accontzu, chi cumprumittint su benessere de sos istranzos. Sunt bistadas signaladas mancias de affungu e umididade in sas istantzias, trastos guastos e ventanas chi non funtzionant.

Atteros problemas po more de sa mancantzia de abba carda po casi vinti dies, una condissione chi af fattu divennere semper pius diffitzile sa vida de donzi die de sos istudiantes. Fintzas sos logos de fora de sas domos sunt abbandonados, cun giardinos prenos de erba mala e nissunu signale de tribaglios fattos dae pagu tempus.

In mesu de sos problemas pius importantes bi est s’ausentzia de sa connessura de su Wi-Fi chi siat firma e funtzionet. Custu limite de sa tecnologia est grae meda po sos istudiantes, a sos calet serbit Internet po istudiare, preparare sos esamenes e partetzipare a sas attividades online.

Est bistada evidentziada sa netzessidade de interventos lestros e chi potant ponnere a postu sa situassione po mezorare sas cunditziones de sas istrutturas, siat a livellu istrutturale siat in sos servitzios apparados. Sa dimanda de sos istudiantes si cuncentrat supra sa garantzia de modellos de domos chi tenzant dignidade e funtzionalidade, chi permittant de si cuncentrare supra sos istudios chentza teppere accomettare atteras difficultades.

Sas domos de sos istudiantes tiant a essere una base de fundamentu po chie istudiat attesu dae domo, ma sas cunditziones de custu temmpus de sas istrutturas de Casteddu arriscant de las revertire in d’unu atteru pesu po sos istudiantes.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22