Femina aggurteddada in Tattari: s’affraccadore presumidu est su tiu de su maridu.

Sa femina, una de chimbanta annos, est bistada corfida a s’ischina, su prumone e a sos renes. S’omine de 55 annos, est bistadu arrestadu pagu tempus pustis de su tentadu mortoriu de sa femina. Una disgrassia si est cossumada a manzanu tardu in Tattari, in d’una domo in sa carrela Cabu d’Ispiga, in sa zura arta de su trichinzu Monte Rosello.

Un femina de casi 50 annos est bistada aggurteddada in manera isferizada, retzinde isticchidas graves meda chi ant dimandadu un’interventu de sos duttores lestru meda in s’ispidale Santissima Annunziata de Tattari. Secundu sas primas novas bessidas a pizzu dae sas iscruccullas de s’Isquadra Mobile de sa Politzia de Tattari, cun su dirigente Michele Mecca, s’affraccadore tiada podere essere un’omine de 55 annos, tiu de su maridu de sa femina.

S’omine est bistadu arrestadu in pagos minutos pustis de s’accadessimentu gratzias a s’interventu lestru meda de sa politzia.

Sa femina est bistada corfida parizzas bortas cun d’unu burteddu de coghina chi teniat un’atza longa e acuta. Sas isticchidas sunt bistadas meda graves: sa femina est bistada isticchida prima a s’ischina, pustis a unu prummone e infinis a unu rene, chi est bistadu pertusu dae s’atza. Pustis de s’attaccu, sa femina est resessida a si cuare in d’una istantzia de sa domo, teninde unu momentu de assulenu solu cando si est abizzada chi s’affraccadore si che fit andadu.

Mancari intenderet dolore e su periculu chi s’omine torrerat, at acciappidu sa fortza de dimandare azzudu a una bighina de domo. Custa at giammadu sos succursos e sa politzia in presse meda, permittinde un’interventu lestru.

In sa domo sunt arrivados sos de sa politzia e un’ambulantzia de su 118. Sa femina est bistada leada in presse meda a s’ispidale Santissima Annunziata in coditze ruju, inue l’ant operada in presse meda po li salvare sa vida. Sa femina est sempre grave, ma sos duttores sunt faghinde su chi est possibile po la salvare.

In su mentres, sa politzia si est posta a chircare s’omine, e l’at agattadu in sa mattessi zura pagos minutos pustis de s’affraccada. S’omine est bistadu frimmadu e che lu ant giuttu in Questura po li faghere sas dimandas. Incuddane sunt arrivados fintzas sos de s’iscentifica po faghere sos cabbales e regollere proas chi potant servire a faghere cumprendere comente tottu custu est sutzessu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22