Casteddu, Pratta Matteotti est pronta a iscobiare sa cara nova sua.

Pustis de un’isettu longu meda, Pratta Matteotti in Casteddu si preparat infinis a si mustrare in sa beste sua rennovada. Sos tribaglios po la ponnere a postu, partidos pius de unu’annu faghet, sunt arrivados a sa fine, signande sa prossima abertura de sa pratta, chi est unu puntu de relata importante po tzittadinos e turistas.

Sa nova Pratta Matteotti si presentat cun d’una beste moderna e funtzionale, progettada po mezorare sa viabilidade e sa bellesa de su logu. In mesu de sas novidades printzipales bi sunt una appadentadura nova, chi dat elegantzia e un’attammannada a sa zura, e zuras birdes mannas meda chi dant unu toccu de friscura e nadura in su coro de sa tzittade de Casteddu.

Sos vialeddos intro, torradoso a faghere de su tottu, sunt bistados fattos po offerrere a sos bisitadores sa possibilidade de passizzare cun calma, creande unu logu chi imbidad a adobiare sos ateros.

Fintzas sas frimmadas de sos autobus, chi sunt de fundamentu po su trazu pubbricu de sa tzittade, sunt bistdadas rennovadas. Sas barandiglias chi las arrodaiant, deffininde su cantieri, che las ant a bogare luego, faghende divennere tottu sa zura pius disposta e atzessibile. Custu interventu non solu at a mezorare sa funtzionalidade de sa pratta, ma contribbuit a creare unu logu importante meda po su collegamentu intre sos cuarteris de sa tzittade e po s’accattu de chie arrivat in tzittade.

Su cantieri de Pratta Matteotti, partidu pius de un’annu faghede, depiat finire intre su mese de Capidanni de su 2024. Bell’ e gai, po more de ritardos ligados a motivos tecnicos e a sa cumplessidade de unu progettu gai agudissiosu, sa fine de sos tribaglios est bistada ispostada a su 31 de Nadale 2024. Como, cun sa fine de sos urtimos particulares, paret chi s’ abertura siat cosa de pagas dies.

Su sonniu de su progettu, difattis, est bistadu cussu de torrare a sos casteddaggios e a sos bisitadores unu logu chi ponzat impare funtzionalidade e bellesa, capatze de accasazzare abbenimentos, passizzadas o solu momentos de relax a s’umbra de zuras birdes novas. Sa posissione de Pratta Matteotti, posta a cara de s’istatzione de sos trenos e a sas frimmadas de sos autobus, la faghet divennere unu de sos printzipales logos de intrada a sa tzittade.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

S’istoria de su Casteddu Fubbalu, s’isquadra simbulu de sa Sardigna.

Sa sotziedade fundada in su 1920 in sa tzittade de Casteddu. Dae prus de chentu annos est unu puntu de relata po s’isport sardu e po medas appassionados de fubbalu. In sos primos annos de s’istoria sua, s’iquadra giogaiat mescamente in sos campionados regionales e minores de su fubbalu italianu. In cussu tempus su Casteddu non fuit ancora intre sas isquadras prus fortes de s’Italia, ma cun su passare de su tempus est creschida e at incumintzadu a mezzorare sos risurtados suos.

Una bortada importante arribat in sos annos Sessanta,cando su Casteddu resessit a arribare in Serie A, su campionadu prus importante de su fubbalu italianu. Dae cussu mamentu s’isquadra incumintzat a si faghere connoschere semper de prus fintzas a livellu naztionale. Su mamentu prus importante de s’istoria de su club arribat in s’istajone 1969-1970. In cuss’annu su Casteddu resessit a binchere s’iscudetto, su campionadu italianu. Est unu risurtadu istoricu pro itte est s’unicu iscudetto binchidu dae un’isquadra de sa Sardigna.

In cussos annos s’isquadra fuit ghiada dae s’allenadore Manlio Scopigno e intre sos giogadores prus importantes bi fuit Gigi Riva. Riva est cussideradu unu de sos attaccantes prus mannos de s’istoria de su fubbalu italianu. Gratzias a sos goals suos est divennidu su simbulu de su Casteddu e fintzas unu de sos giogadores prus amados dae sos tiffosos sardos.

Sa binchida de s’iscudetto est bistada una festa manna po totta sa Sardigna. Fintzas oe cussu sutzessu est ammentadu cun galabera manna e d’est unu de sos mamentos prus importantes in s’istoria de s’isport italianu. Pustis de cussos annos su Casteddu at sighidu a giogare po meda tempus in Serie A, ma at tentu fintzas mamentos diffitziles. S’isquadra at tentu simanas positivas e atteras prus cumplicadas, cun carchi masqada in sas categorias prus bassas. In sos annos Noranta su Casteddu est torradu a tennere resurtados bonos e at partetzipadu fintzas a cumpetissiones europeas, accomettande isquadras de atteros Paisos. Ets bistadu unu periodu importante po sa sotziedade e sos tiffosos.

In sos urtimos annos s’isquadra est bistada in serie A e in serie B.Mancari custu, su Casteddu sighit a essere un’isquadra sighida meda e d’est fintzas oe unu simbulu po totta sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22