In Cortoghiana, fratzione de Carbonia, sunt apparessidas iscrittas cun minettas a su cunsizzeri de su Partidu Democratigu Alberto Pili. Sas frases, fattas cun s’ispray supra s’isfaltu in daenanti de su zilleri de propriedade de su cunsizzeri, ant ischidadu affuscu e indignassione meda in sa comunidade e intre de sas istitutziones de su logu.
S’accadessimentu est bistadu signaladu in presse a sas autoridades.

Su sindigu de Carbonia Pietro Morittu at comunicadu tottu a su Prefettu e at attivadu s’amministratzione de su comune po accomettare s’accadessimentu. Una borta chi sa Politzia de su logu at finidu cun sos rilievos, s’Uffitziu comunale che at iscancelladu sas iscrittas.

S’amministratzione de su comune at affiantzadu s’azzudu prenu a Alberto Pili, arremazzande s’importantzia de diffendere chie tenet incarrigos istitutzionales e de affiantzare chi cosas comente custa no torrent a capitare.

Custa cosa at iscuttinadu dae sas fundamentas sa comunidade de Cortoghiana e Carbonia, acciappande sa cundenna dae parte de tottu sos tzittadinos e sas istitutziones. In paritzos ant mustradu accottu a su cunsizzeri, riconnoschinde s’impignu e sa dedissione sua a su servitziu de sos tzittadinos.

Sa politzia at fattu partire un’iscruccullu po chircare sos responsabbiles. Ant leadu sas immagines de sas telecameras de custodia chi bi sunt in cussa zura po chircare elementos chi serbant a mustrare sos chi ant fattu tottu custu. Paritzas sunt bistadas sas attestassiones de sos chi narant de essere accanta, commente politicos e zente chi faghet parte de sa sotziedade tzivile, chi ant evidentzidu comente cosas comente custa no sunt solu un’attaccu a sa pessona, ma fintzas a s’assentu democratigu.

S’accadessimentu de Cortoghiana s’inficchit in d’unu cuntestu pius largu, chi evidentziat unu creschimentu de sas intimidassiones a sos amministradores locales in zuras divressas de s’Italia. Custu accadessimentu est an’ammunimentu supra sa netzessidade de affortigare sa sicuresa e de favoressere sa sicuresa e sa cultura de sa legalidade e de su rispettu.

In su mentres, Alberto Pili at rezzidu s’accottu de totta sa comunidade e de sas istitutziones, unu signale importante meda po arremazare chi violentzia e minettas no potant acciappare logu in d’una sotziedade tzivile.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Emergèntzia pro Manuel Desogus: serbit azzudu pro su trazu mèicu in Sardigna

Dae sa Sardigna arribat un’apellu urgente e disisperadu pro torrare a domo Manuel Desogus, unu zòvanu de 38 annos naschidu in s’Ìsula, como coberradu in cunditziones graes, ma istabiles, in sa teràpia intensiva de s’ispidale Charité de Berlinu. Sa situatzione de su zòvanu, chi dae prus de dòighi annos bivet e tribagliat in Germània, est drammàtica e ponet a proa tosta sa famìllia, ancora sinzada dae sa pèrdida de sos genitores de Manuel.

Duos meses a como Manuel est istadu corpidu dae un’infetzione cardìaca grae meda chi at dannadu in manera irreversìbile duas valvulas de su coro. A custa cunditzione si est azzunta una ischemia, trombosi e àteras cumpricatziones chi ant fatu divennere su cuadru clìnicu crìticu meda.
Mancari sa gravidade, de sa situatzione sos mèigos cunsìderant istabiles sas cunditziones suas, ma su zòvanu s’agatat a tesu dae sa terra e sa famìllia
sua, cumpletamente solu a afrontare una batalla difitzile e ispramosa.

Ignàtzia, sa tia sua, est s’ incarricada de sa famìllia e at ispainadu s’apellu cun s’isperantzia de tennere solidariedade. Contat chi Manuel, sempre allègru e prenu de vida, non tenet prus sa fortza ne sas resursas emotivas e fìsicas pro accomettare custa proa a tesu dae sa Sardigna. Sa pèrdida de sos genitores at lassadu unu boidu mannu, e commo sos parentes prus istrintos sunt abarrados solu issos, cun su disìzu de pòdere èssere in costazos suos in unu mamentu gai delicadu e detzisivu pro sa vida sua.

A cumplicare meda sa situatzione bi est unu problema burocràticu de non pagu contu: a pustis de annos de traballu a s’esteru, Manuel non tenet prus un’assicuratzione sanidària ativa. Custu impedit a s’ispedale tedescu de coberrere sas ispesas de sas curas, faghinde divennere netzessàriu un’interventu istravanadu pro lu faghere torrare in Itàlia.

S’unica solutzione possìbile est de ordiminzare unu trazu mèigu amparadu, dae sa teràpia intensiva tedesca a sa teràpia intensiva in Sardigna, cun meigos ispetzializados chi siant capatzes de garantire s’azzudu de sa vida in su mentres de su biàziu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”