Oschiri est bivinde una situassione de discumbeniu grave meda po sa mancantzia de unu duttore de famiglia, problema chi bi est da pius de un’annu. Sa comunidade, cumposta po sa pius parte de bedustos e pessonas cun maladias cronigas, est patinde sas conseguentzias tropposas de custa assentzia, chi rendet diffitzile de s’accurtziare a curas primarias e assistentzia sanidaria de base.

Po accomettare su problema e apprettare un’interventu lestru, sos abitantes de sa bidda sunt falados in pratta cun d’una manifestassione paghiosa. Unu curteu longu at rugradu sas carrelas printzipales, poninde in lughe su tzerriu de azzudu de una comunidade chi s’intendet ismenticada.

Sa protesta est accabbada cun d’una frimmada in daenanti de su Comune , inube sos tzittadinos ant dimandadu de essere iscurtados e de tennere rispostas beras dae parte de sas istitutziones locales, regionales e natzionales.

Sa cunvocatzione naschet dae sa delusione po una situassione sanidaria chi non si podet atzettare. Su serviziu a tempus, attivadu dae sa Regione po mesu de s’Ascot non benit cunsideradu bastante. Custu sistema, chi prevedit s’interventu de duttores in modalidade istravanada, no riessit a garantire su cugutzu chi serbit po una comunidade comente cussa de Oschiri.

Sos isettos longos, sa mancantzia de unu appitzicu firmu cun d’unu duttore de cunfiantza e sa precariedade de sas solussione proponnidas sunt faghinde arnegare sa populassione, chi a s’ispissu si agattat custrinta a si bortare a sos ispidales pius attesu, creande discumbenios e ispesas in pius. In daenanti de custa situassione, su Comitadu Salude Oschiri, naschidu po cordinare sas mossas de protesta e faghere connoschere sas netzessidades de sa comunidade, at dezisu de faghere cun determina.

Pustis de sa manifestassione, su Comitadu, imparis cun sos tzittadinos, at abbisadu de un’atteru passu: s’imbiu de litteras raccomandadas a sos uffitzios de sas ASL cumpetentes e a sos chi istant pius in artu in s’ASL regionale. S’intentu est de apprettare un’interventu istrutturale chi torret a sa bidda unu duttore de base firmu, garantinde gai su rispettu de sos dirittos de fundamentu po sa salude. Sa bidda, giai signada dae difficultades tipicas de sas cussorzas internas e de campagna, non si cheret rassignare a una condissione de disamparu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22