Su nuntzu de sa serrada anticipada de sa linia zincu in sa fravica de Portovesme, annuntziada dae Glencore, est unu corpu tostu meda po s’accolomia e sa sotziedade de s’iscrocca.

Sa “mutinatzionale” at dezisu de firmare s’attividade dae su 23 de su mese de Nadale, cun d’una comunicatzione tott’in d’unu chi ponet in arriscu 1.200 logos de tribagliu. Sa detzisione, leada chentza ispettare s’addobiu tennicu prevedidu cun sos responsabbiles de su Ministeru, at iscadenadu un’aundada de indignassione, battinde sa presidente de sa Regione Sardigna a partetzipare.

Sa presidente si est cumparada luego a su telefono cun su Ministru de sas Impresasa e de su Made in Italy, Adolfo Urso, po resumere e istudiare itte si podet faghere impare. Sa serrada de sa fravica non solu est una minetta grave po sos tribagliadores chi intzidint, ma evidentziat puru un’aera chentza rispettu perunu dae parte de Glencore in sos cunfruntos de sas istitutziones e de sos sindacados.

Sa presidente at evidentziadu comente custa detzisione no potat essere agguantada e at assiguradu chi sas istitutziones sardas non ant addurare a abbaidare. Su nuntzu de sa Glencore arribat in d’unu momentu giai criitgu po
s’accolomia de sa Sardigna, corpande unu de sos polos industriales pius importantes de sa regione. Sa favrica no rappresentat solu unu logu de tribagliu po mizaia de pessonas, ma est fintzas un’elementu detzisivu po tottu sa contestura de sa produssione sarda. Sa serrada de sa linia zincu arriscat de faghere incumintzare una crisi chi tiat podere pertoccare paritzas familias, fornidores e atteros chi bi tribagliant.

Sos sindacados,sustados dae su nuntzu de repente, ant deffinidu su tremesu de Glencore comente una cosa chi non si podet atzettare. Sos sindacados si sunt dande de itte faghere po diffendere sos logos de tribagliu e dimandant a su Guvernu de faghere carchi cosa in presse meda. Sa Regione Sardigna, in su mentres, est tribagliande po creare unu fronte comune cun sas autoridades natzionales e garantire chi sos dirittos de sos tribagliadores benzant tutelados.

Su ministru Adolfo Urso, chi aiat giai progettatu un’addobiu tennicu cun Glencore, at espressadu affuscu meda po sa situassione e at promittidu un’analisi devuccada de su chi serbit po accomettare sa crisi.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22