Su Cannonau, figura de su connottu de su binu de sa Sardigna, si preparat a si contare sutta una lughe nova, abbratzande s’annoamentu e sos inclinos de oe. Gratzias a unu progettu favoressidu dae Sardigna Chertas impare cun s’Universidade IULM de Milano e Assoenologi Sardigna, custu binu ruju tzelebre si proponnet de conchistare puru sas ingendras novas cun su claim: “Cannonau: su binu zovanu”.

S’initziativa tenet s’intentu de istudiare su Cannonau in tottu sos trattos suos, dae cussos de su gustu a cussos ligados a s’immagine sua, iscumbattande mezzos de comunicatzione e de posissionamentu in su mercadu novos.

Mariano Murru at evidentziadu s’importantzia de unu limbazu de su tempus chi semus bivinde po faghere connoschere su Cannonau supra sos social media e intre sos zovanos mannos, evidentziande comente in Sardigna bi siat ancora meda tribagliu de faghere in sa comunicatzione moderna.

Su progettu s’isfroscat in duas fases printzipales. Sa prima, chi ponet impare consumadores, istudiantes e impresas chi faghent binu, si cuncentrat supra s’analisi de su trend de consumu e de sas preferentzias de sapore, cun d’una attentzione particulare supra sos zovanos mannos.

Po mesu de tennicas de su connottu de su Marketing, intervistas e istrumentos novos comente su neuro-marketing, ant essere medidos in manera iscientifica sos puntos de attiramentu de su Cannonau, dande datos pretziados meda po orientare sa produssione a sas esigentzias de sas ingendras novas.

Sa secunda fase si bortat a sa comunicassione de su tempus de oe, puntande a affortigare sa presentzia de su Cannonau supra sos canales digitales e faghindelu connoschere cun sa limba chi andet bene a unu pubbricu pius zovanu.Custu coladorzu est de fundamentu po favoressere unu consumu sciente e responsabbile,addia chi po assebestare irbirgos chi serbant po mezzorare sa posissione de su prodottu in su mercadu.

Su Cannonau, cun s’arranzu suo, si prestat po assulenare gustos divressos e a essere appretziadu in paritzas occasiones. Dae s’ispumante a sos modernos arrosados, dae sos rujos zovanos e fruttados a sos binos pius
fortes e riservas, fintzas a sos “passitos” e fortalessidos, su tzelebre ruju sardu podet rispondere a medas esigentzias e preferentzias.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna in daesegus in sa classifica supra su clima e calidade de sa vida.

Su clima podet fittare supra sa calidade de sa vida in sas tzittades e sos datos prus reghentes lu cunfirmant fintzas pro sa Sardigna. In sa classifica de sas tzittades printzipales pubbricada dae su Sole 24 Ore, chi controllat sas cundissiones climaticas e su corpu supra sa vida de donzi die, carchi tzittade de s’isula si agattat in sa parte prus bassa de sa classifica natzionale.

In manera particulare est Carbonia a serrare sa classifica cun su 107° postu, s’urtimu intre sas tzittades printzipales esaminadas. S’istudiu leat in cussiderassione paritzos trattos de su clima pro cumprendere cantu sas cundissiones meteo potant influentzare su benessere de sas pessonas e sa vivibilidade de sos tzentros de sas tzittades. S’analisi si accottat supra 15 motivos ligados a su clima. Intre custos bi sunt s’intensidade de s’abba, su numeru de sas nottes in sas cales sa temperadura minima non calat sutta sos 20 grados, sas dies de cardu urtimu, sa presentzia de bentu in su mentres de s’istiu e s’umidesa de s’aria.

In su casu de Carbonia, secundu sos datos regortos, pesant mescamente sas temperaduras artas meda registradas in s’annu e su numeru minimadu de dies frittas o cun abba allongada. Custas cundissiones climaticas fittant supra su risurtadu finale de sa tzittade de su Sulcis chi si acciappat duncas a s’urtimu postu de sa classifica.

Est importante evidentziare chi s’istudiu si relatat a sos datos de su 2025 e non tenet contu de cantu accadessidu in sos primos meses de su 2026, cando totta sa Sardigna est bistada interessada dae una simana de abba prus bundante in cunfrontu a sa media de sos urtimos annos.Una cosa fora de norma de su clima chi at distintu s’incumintzu de s’annu ma chi non recuit in s’analisi impittada po faghere sa classifica.

Abbaidande su restu de sa classifica si nodat chi a sos primos postos si agattant mescamente tzittades supra su mare Adriaticu. A su primu postu de sa classifica bi est Bari. Sa classifica evidentziat comente su clima siat divenninde un’elementu semper prus importante cando si faeddat de calidade de sa vida in sas tzittades. Sas temperaduras artas meda, sos periodos de assuttura o a su contrariu de abba meda sunt cosas chi fittant supra sa salude, s’ambiente e supra sa vida de donzi die de sas pessonas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22