Un’intesa importante meda est bistada firmada intre sa Regione Sardigna e tres istitutziones iscientificas a livellu natzionale: S’istitutut Natzionale de Fisica Nucleare,  s’Istitutu Natzionale de Astrofisica(INAF) e s’istitutu Natzionale de Geofisica (INGV).

S’intentu printzipale de s’accordu est de accomettare sa candidadura de su logu accanta a sa miniera abbandonada de Luvula comente situ po accasazzare s’Eintein Telescope, unu progettu de punta po sa cherta internatzionale supra sa fisica de sas undas gravitatzionales.

S’accordu puntat a creare unu coordinamentu chi abbarret semper e chi ponzat impare sos entes chi partetzipant. Custas assiones si ant a cuncentrare supra capos divressos: dae s’indilighimentu e informatzione supra sa candidadura, a su mezzoru de s’iscrocca, fintzas a sa balorizzazione de s’identidade culturale e de su patrimoniu archeologicu de s’iscrocca.

S’afficcu iscientificu e didatticu giogat unu rolu tzentrale, cun iniziativas dedicadas a sa formassione iscientifica e tennica, addia a sa balorizzatzione de attividades de cherta in campos inportantes meda comente geologia,architettura,inzennieria e istudios supra s’effettu ambientale e sotziu-accolomicu.

In mesu de sos elementos de fundamentu, s’accordu prevedit su mezzoru de sos servitzios de trazu, comente aereos e carrelas, e s’istudiu de solutziones de mobilidade chi si potat sustentare chi serbat a sas esigentzias de s’Einstein Telescope. In pius si prevedint interventos po favoressere s’accollimentu de chertadores chi arribant dae fora, su fraigu de iscolas internatzionales e atteras initziativas po favoressere s’isviluppu de s’iscrocca.

Su cordinamentu de sas attividades at essere garantidu dae unu cunsizzu de controllu de ses pessonas, unu po donzi ente chi nde faghet parte, cun sa Presidentzia chi at essere dada a sa Regione Sardigna. Custu organismu at a tennere su compidu de controllare sos avantzamentos de sas initziativas e garantire una collaborassione balida de sos entes.

Sa candidadura de sa miniera de Luvula est un’opportunidade istravanada po sa Sardigna e po sa comunidade iscientifica internatzionale. Si at essere isseperada, sa zura tiat podere divennere unu tzentru de eccellentzia de tottu su mundu po sa cherta iscientifica.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sos pastores sardos torrant in pratza: su 21 de martzu defensa in s’S.S.131.

Su mundu agro-pastorale de sa Sardigna torrat a faghere intendere sa boghe sua. Su 21 de marthu 2025 sos pastores e sos massajos de s’isula ant a calare un’attera borta in pratza po bogare a pizu contra sa crisi de custu campu, ordiminzande una defensa in sa carrela Istatale 131 DCN, una de sas printzipales carrelas de collegamentu de s’isula. Sa protesta chi at regortu chentinaja de adesiones, si at a tennere cun duos corteos distintos chi si ant addobbiare in Nugoro.

S’initziativa est bistada dezisa in su mentres de una assembrea pubbrica chi at bidu  s’intzidida de casi milli pastores, massajos e paritzos
sindigos de s’iscrocca. A su tzentru de sa protesta bi sunt sos problemas ligados a su pretziu de su latte berbeghinu, chi sighit a essere abbisadu troppu bassu, po garantire de iscampare a sas dittas de sa laurantza. In pius, sos cumproantes denuntziant su mancadu pagamentu de rimbursos e contribbudos dae parte de sa Regione Sardigna, situassione chi aggravat de pius sas difficultades accolomicas de su campu.

Soso duos corteos ant a partire unu dae Otzana e s’atteru dae su Sologo, ambos tzentros de su Nugoresu, e ant a passare in s’istatale 131 DCN. Su campu agro-pastorale sardu est rucrande una crisi funguda giai dae annos. Su pretziu de su latte berbeghinu, chi est una de sas printzipales boghes de reddidu po sos pesadores de s’isula, sighit a essere troppu bassu po coberrere su pretziu de sa produssione. A custu si aggiunghet sa cuncorrentzia de su mercadu internatzionale, sas difficultades ligadas a sa burocratzia e su mancadu pagamentu de sos contribbudos regionales chi diant aere teppidu agguantare custu campu in d’unu momentu gai dilicu.

Sos pastores sardos, chi giai in su 2019 funt bistados interpretes de protestas prenas de cramore, comente ch’aere imboladu su latte in carrela po denuntziare sa cundissione insoro, torrant duncas a si dare itte faghere po dimandare provvidentzias beras dae parte de sas istitussiones.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22