Su Nadale in Sardigna si acciarat un’occasione de frementu accolomicu mannu, cun d’una ispesa chi si pensat siat de 726 miliones de euros. De custa tzifra, casi 501 miliones ant essere destinados a cosa de mandigare e de buffare, mentres 225 miliones ant andare a atteros produttos e servitzios tipicos de sas festas de Nadale. In cunfrontu a su 2023, si registrat una creschida de s’ispesa de 41 miliones de euros.

Custos datos bessint a pizzu dae un’istudiu chi est bistadu fattu dae Confartigianato Sardigna, chi partit dae datos de Istat e UnionCamere. Sas comporas po sas festas ant a incluidire una variedade de elementos comente pane, pasta, petta, sardizza, casu, durches e binu, ma puru un’isseperu riccu meda de produttos de sos maistros artisticos e de su connottu, chi ant agattare logu supra sas mesas de sos sardos e sutta s’arbure de Nadale.

Sas buttegas artigianas giogant unu rolu de fundamentu in custu campu. In Sardigna bi sunt 8.450 realidades artigianas, chi sunt su 30,1% de sas pitticcas e pius mannas de s’isula e sunt attivas in 47 campos de sa produssione. Cun 20.654 chi bi tribagliant, custas buttegas offerrint produttos e servitzios perfettos po sos donos de Nadale. In mesu de sas comporas chi si faghent de pius bi sunt cosa de pappare e binu, ma fintzas bistires, prendas, alascias, cosas po sa domo,cristallos, aimas, robba po s’isport, libbros e servitzios po sa cura de sa pessona.

S’ispesa de Nadale est divisa in manera de signifficu intre sas provintzias. In Casteddu si prevedit un’ispesa de 196 miliones de euros, de sos cale 135 po cosa de pappare e buffare e 61 po servitzios tipicos de su Nadale. In Nugoro si prevedint 91 miliones, cun 63 po cosa de pappare e 28 po sos atteros benes. Aristanis prevedit un’ispesa de 67 miliones, cun 46 po sa cosa de pappare e 21 po sos produttos de Nadale. In su Mesudie de sa Sardigna 149 miliones, cun 103 riservados a cosa de pappare e buffare e 46 a sos servitzios. Tattari-Gaddura registrat s’ispesa pius arta, cun 222 miliones in tottu, de sos cales 154 po cosa de pappare e 69 po produttos de Nadale.

Cun s’arrivu de sas festas, Confartigianato at affiladu sa campagna “Comporamos locale”. S’initziativa serbit po indilighire sos cossumadores supra s’importantzia de seperare produttos de sos maistros fattos in Sardigna e in Italia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Carrelas serradas, proibbissiones de arressada e zuras de su tzentru off limits: Nuogoro si approntat a sa bisita de su Presidente de sa Repubblica.

Nugoro si approntat a accollire su Presidente de sa Repubblica Sergio Mattarella e lu faghet cun d’unu pianu de organizassione mannosu chi prenettat carrelas serradas, proibbissiones de arressada e paritzas zuras de su tzentru de sa tzittade off limits po garantire sicuresa e ordine pubbricu.

Su Capu de s’Istadu est isettadu in s’isula po sos chentu annos de su premiu Nobel de Grassia Deledda, affussione de balore istoricu e culturale istravanadu po sa Sardigna e in manera particulare pro Nugoro.

Su Presidente Mattarella at arribare in Nugoro po intzidire a sas tzelebrassiones uffitziales dedicadas a s’iscrittora nugoresa, unica femina italiana chi at binchidu su Nobel po sa Litteradura. Su programma de sa visita sua prenettat una arressada a su Teatru Eliseo, inube bi at essere unu mamentu istitutzionale tzentrale de sa zoronada, e prus a tardu una bisita a sa domo-museo de Grassia Deledda, logu frigura de sa memoria e s’identidade culturale de sa tzittade.

Isettande s’arrivu de su Capu de s’Istadu, su Comune at preparadu unu pregone chi cambiat sa passada in manera de signifficu. In sas oras prima e in su mentres de sa bisita, bi ant essere proibissiones de arressada in sas carrelas in sas cales at a colare su curteu presidentziale e in sas zuras accanta a su Teatru Eliseo e sa domo- museu. Carchi carrela de su tzentru at essere serrada a su traffigu po carchi mamentu, mentres atteras zuras dislindas ant essere serradas fintzas po sos chi andant a pe po permittere chi sos appuntamentos istitutzionale si pottant faghere in siguresa.

Affortigadas sa mesuras de siguresa cun s’interventu de sa Prefettura, Questura e de sa politzia. Si prenettant controllos,travessas e politzia in sas zuras diligas de sa tzittade. S’intentu est cussu de garantire una bisita sigura,allindande meda sas discumbenias po tzittadinos e mercaderis, chi sunt bistados informados dae tempus de sas modifficas de sa circulassione.

Sa presentzia de Sergio Mattarella est unu mamentu de braga manna pro Nugoro, chi si approntat a tzelebrare una de sas friguas suas prus e importantes. Sa tzittade bivet oras de isettu e fermentu: iscolas,assotzios culturales e istitutziones sunt interessadas a ordiminzare sos abbenimentos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22