Su Casteddu bessit dae sa Coppa Italia e como si cuncentrat supra sa prossima porfia contra su Venezia. Contra sa Juventus, s’isquadra at mustradu unu cuntattu bonu in su primu tempus, mancari bi siat bistadu su solitu goal patidu chi sighit a essere unu problema. In su secundu tempus, peroe, est arrivada un’isciarada netta, cun sos biancunieddos chi ant serradu sa partida po 4-0.

Sos Rujublu ant creadu pagos perigulos po su porteri de s’attera isquadra Di Gregorio, evidentziande una tzerta difficultade offensiva. Custu risurtadu mustrat sa terza derrotta una fattu de s’attera po su Casteddu, cussiderande su Campionadu e sa Coppa Italia. Intamen, bi est una istatistica chidat corazzu: pustis de tres derrottas una fattu de s’attera, s’isquadra at fintzas ai commo repricadu faghinde puntos.

Como, sa traslata de Venezia diventat unu passaggiu importante, no solu po su Venezia, ma fintzas po sos sardos, chi sunt sos terzos in sa classifica partinde dae sutta, e chi sunt giammados a una proa de carattere po pigare in artu in sa classifica.

Sa partida contra sa Juventus at evidentziadu una presta chi at cumbinchidu pagu dae parte de Marin e Gaetano, duos giogadores dae sos cales tottu si ispettant de pius. Po sa porfia de Venezia, Nicola paret chi tenzat s’intentzione de puntare supra Viola. A dolu mannu, Luvumbo no at essere dispostu po unu dannu fisicu e no at podere partetzipare a sa traslata.

Secundu Nicola, s’isquadra at fattu unu primu tempus bonu contra sa Juventus, ma si est abbassada in su secundu tempus, dassande logu a sas calidades de sa Juventus. Bi est dispiaghere po no essere resessidos a passare sa muda, ma s’allenadore pensat chi s’isquadra eppat in donzi modu onoradu sa cumpetissione, cunsiderande sas difficultades de giogare contra un’isquadra de cussu livellu. At fintzas postu in evidentzia comente esseret importante faghere giogare calicunu chi non si usat meda, mancari si esseret a connoschentzia chi paritzos de issos tenent sa netzessidade de creschere ancora.

Como, s’intentu est de torrare a partire. Su calendariu rechente at postu su Casteddu a cara a pare cun isquadras de livellu artu meda comente Fiorentina, Atalanta, Juventus in solu deghe dies. S’isquadra at mustradu prestassiones bonas in duas occasiones e unu primu tempus bonu contra sa Juventus, ma contra isquadras gai fortes, donzi faddina, mancari pitticca podet risurtare detzisiva. Nicola pensat chi su fubbalu modernu dimandet de faghere su giogu chentza s’istrinzire a si deffendere, e custa est sa mentalidade chi su Casteddu est chircande de fraigare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

A s’iscoberta de su logu archeològicu prus bellu de Tortolie

Su logu archeològicu de S’Ortali ’e su Monti, postu in s’iscrocca de Tortolie, in Ozzastra, est unu de sos cumplessos preistòricos e protostòricos prus importantes e mènzus cunservados de sa Sardigna. Postu intre duos rilievos a pagos chilòmetros dae su mare, in sa carrela chi che leat a sa plaja de Orrì, su logu apparat unu viazzu raru in mesu a millènnios de istòria, arregande testimoniàntzias chi partint dae su Neolìticu e arribant a s’edade de su Brunzu.

Inoghe si podet ammirare una domus de janas chi benit dae su Neolìticu reghente, iscavada in sa roca e destinada a s’interru cumone, duos menhir abbarrados chi faghent pensare a s’antiga presentzia de un’alliniamentu megalìticu e unu tzìrculu de pedra de casi 12 metros de diàmetru, ligadu a ritos o pràticas de comunidade de s’edade de su Ramene.

De importu particulare est sa tumba de sos Zigantes, architetura funerària tipica de sa tziviltade nuràgica, cun unu passaditzu longu de interru, incornissadu dae s’esedra, chi contat sas usàntzias antigas ligadas a su cultu de sos mortos. Su coro de su cumplessu est però su nuraghe S’Ortali ’e su Monti, una istruttura manna de pedra fraigada forzis in su 1500 a.C., formada dae unu bastione tzentrale e dae unu bastione elliticu cun turres a costazzos, un’òpera chi testimonzat sas capatzidades de fraigu e organizatzione de sos nuràgicos.

In giru a su nuraghe s’istèndiant sa bidda e zuras de tribagliu diferentes, intre de sas cales bi fuint logos de manizu e mescamente, silos pro sa cunservatzione de sos tzereales, elementos chi mustrant s’importu de sa lauranza in sa vida de donzi die de sas comunidades de cussa edade. Bìsitare S’Ortali ’e su Monti cheret nàrrere a s’infùndere in d’una bista ancora intrea, in ue sa presentzia de s’òmine antigu faeddat cun sa natura a inghìriu e apparat unu cuadru claru de comente sas populatziones preistòricas isseberaiant e modellaiant sos logos in ue bìvere.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”