Non si sunt ancora isortas sas dudas supra sos motivos de sa morte de Zouhair “Zuzu” Lamouna, su piccioccu de vint’annos de bessida marocchina acciappidu chentza vida in su lettu suo, dominica passada, 10 de Nadale, dae su babbu ei sa mama in sa domo de viale Trento in Tattari.

Custu manzanu, in s’Istitutu de Patologia Forense, est bistada fatta sa lotomia po contu de sa procura, ma dae sos primos risurtados non sunt arrivadas rispostas deffinitivas. Sa lotomia, fatta dae su meigu legale Giovanni Sciarrotta supra dimanda de sa pm Lara Senatore, non at evidentziadu sinnos de violentzia o fertas supra su corpus de su zovanu.

Bell’e gai, s’esame no est bistadu bastante po determinare cun tzertesa sos motivos de sa morte. Po faghere lughe supra custa disaura at essere netzessariu de ispettare sa resessia de atteras analisis meigas- legales, cun esamenes in chirca de velenos e atteros motivos, chi ant a dimandare atteras pagas dies.

Zouhair fit bistadu acciappidu mortu su sero de dominica dae su babbu ei sa mama, pustis de essere torradu a domo a s’arbeschida. Secundu cantu est bessidu a pizzu dae sas scruccullas chi at fattu s’Isquadra Mobile de Tattari, su zovanu aiat passadu sa notte cun sos amigos suos e si che fit andadu a drommire. Cando sos parentes suos sunt bintrados in s’istantzia sua a bortadie, l’ant acciappidu chentza vida. Sos succursos, chi sunt bistados giammados in presse meda, non ant potidu faghere atteru chi narrere chi fit mortu, giai dae paritzas oras.

Sa notissia de sa morte de Zuzu at abbolottadu non solu sa famiglia sua, ma fintzas tottu sa comunidade tattaresa e sos amigos suos. Merculis sero, in sa carrela Tavolara, est bistadu ordiminzadu unu momentu de attuamentu in memoria sua: amigos e connoschentes si sunt istrintos a sa famiglia sua espressande accottu e amistantzia. In su mentres de s’incontru, sunt bistados cussinnados sos fundos regortos gratzias a una porretta fatta sas dies chi sunt sighidas a sa disaura, un’attu chi testimonzat su cunsideru fungudu chi Zuzu teniat in mesu de sos amigos e
connoschentes suos.

In su mentres chi sa famiglia e sos amigos accomettant su dolore po custa perdida de repente, sas autoridades sighint a tribagliare po accrarare sos motivos de sa morte. Sos atteros accertamentos dae parte de sa Procura ant essere de fundamentu po cumprendere sos motivos de una morte chi, fintzas a custu momentu, addurat imboligada in su misteru.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22