Un’umiadroxu internatzionale importante est bistadu segudadu dae Battista Biggio, issinzante de Assentos de Elaboratzione de sas Notissias in su Dipartimentu de Inzenieria Elettrica e Elettronica de s’Universidade de Casteddu. Incumintzande dae su mese de bennarzu, su proffessore Biggio at alcansare su titulu de grandesa de IEEE Fellow, unu de sos riconnoschimentos pius mannos chi dat s’Institute of Electrical and Electronics Engenieers(IEEE).

Benit reservadu donzi annu a unu numeru istrintu de istudiosos e proffessioneris chi, in su cursu de sa carriera insoro, eppant logradu risurtados istravanados in d’unu de sos campos de interessiu de s’IEEE. S’IEEE, s’organizazione iscientifica pius manna e tecnica de su mundu in su campu de s’inzenieria elettrica e elettronica, est riconnoschida comente su puntu de fentomu de su mundu po totta sa comunidade tecnologica.

Po mesu de pubbricassiones, cunferentzias, standard tecnologicos e attividades educativas de livellu artu meda, favoressit su mezoru iscientificu e tecnologicu in medas campos, in sos cales bi est s’intelligentzia artifissiale, sas telecomunicatziones, s’elettronica e sas arrancas annoabiles.

Sa nomina de su proffessore Biggio est bistada motivada dae sos contribbudos suos in s’istudiu de sa sicuresa de sos “algoritmi” de s’intelligentzia artifissiale. Si trattat de unu campu importante meda, in su cale Biggio at fattu chircas chi ant influentzadu cun signifficu s’affroscu de tecnologias pius seguras e de balidia, contribbuinde a su mezoru de s’iscientzia e de sa tecnologia in su mundu.

Su riconnoschimentu de su titulu de Fellow no est solo unu contribbudu a s’eccellentzia accademica, ma fintzas una cona de su podere chi su tribagliu de su proffessore Biggio at tentu supra de sa Sotziedade. Po mesu de sos istudios suos, at contribbuidu a mezorare sa sicuresa de sos appricos fundados supra AI, faghindelos divennere pius fortes e fidantziosos in conditziones critigas comente s’automatzione e sos accraramentos de sa meighina.

Cun custu reconnoschimentu, Battista Biggio si giunghet a sa truppa istrinta de sos istudiosos chi ant dassadu un’imprenta de signifficu in s’avantzamentu de s’iscentzia e de s’inzennieria, contribbuinde in manera detzisiva a su mezzoru de sa sotziedade po mesu de su cambiamentu tecnologicu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22