Non si sunt ancora isortas sas dudas supra sos motivos de sa morte de Zouhair “Zuzu” Lamouna, su piccioccu de vint’annos de bessida marocchina acciappidu chentza vida in su lettu suo, dominica passada, 10 de Nadale, dae su babbu ei sa mama in sa domo de viale Trento in Tattari.

Custu manzanu, in s’Istitutu de Patologia Forense, est bistada fatta sa lotomia po contu de sa procura, ma dae sos primos risurtados non sunt arrivadas rispostas deffinitivas. Sa lotomia, fatta dae su meigu legale Giovanni Sciarrotta supra dimanda de sa pm Lara Senatore, non at evidentziadu sinnos de violentzia o fertas supra su corpus de su zovanu.

Bell’e gai, s’esame no est bistadu bastante po determinare cun tzertesa sos motivos de sa morte. Po faghere lughe supra custa disaura at essere netzessariu de ispettare sa resessia de atteras analisis meigas- legales, cun esamenes in chirca de velenos e atteros motivos, chi ant a dimandare atteras pagas dies.

Zouhair fit bistadu acciappidu mortu su sero de dominica dae su babbu ei sa mama, pustis de essere torradu a domo a s’arbeschida. Secundu cantu est bessidu a pizzu dae sas scruccullas chi at fattu s’Isquadra Mobile de Tattari, su zovanu aiat passadu sa notte cun sos amigos suos e si che fit andadu a drommire. Cando sos parentes suos sunt bintrados in s’istantzia sua a bortadie, l’ant acciappidu chentza vida. Sos succursos, chi sunt bistados giammados in presse meda, non ant potidu faghere atteru chi narrere chi fit mortu, giai dae paritzas oras.

Sa notissia de sa morte de Zuzu at abbolottadu non solu sa famiglia sua, ma fintzas tottu sa comunidade tattaresa e sos amigos suos. Merculis sero, in sa carrela Tavolara, est bistadu ordiminzadu unu momentu de attuamentu in memoria sua: amigos e connoschentes si sunt istrintos a sa famiglia sua espressande accottu e amistantzia. In su mentres de s’incontru, sunt bistados cussinnados sos fundos regortos gratzias a una porretta fatta sas dies chi sunt sighidas a sa disaura, un’attu chi testimonzat su cunsideru fungudu chi Zuzu teniat in mesu de sos amigos e
connoschentes suos.

In su mentres chi sa famiglia e sos amigos accomettant su dolore po custa perdida de repente, sas autoridades sighint a tribagliare po accrarare sos motivos de sa morte. Sos atteros accertamentos dae parte de sa Procura ant essere de fundamentu po cumprendere sos motivos de una morte chi, fintzas a custu momentu, addurat imboligada in su misteru.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Unu viàzu in s’arte: sos chimbe artistas sardos prus famados de s’istòria

Sa Sardigna, in prus de èssere famada pro sas bistas suas chi che  bogant s’alenu e pro su connottu millenàriu, at bidu  nàschere  artistas medas chi ant lassadu unu sinnu chi no si podet iscantzellare in s’istòria de s’arte italiana e internatzionale. Costantinu Nivola, iscultore e muralista de fama internatzionale, Nivola che at leadu s’arte sua in sos Istados Unidos, partetzipande cun architetos mannos comente Le Corbusier e Marcel Breuer. Sas òperas suas sunt caraterizadas dae s’impreu nou de su tzimentu e de sos materiales locales, condimizande modernidade e connottu.

Pinucciu Sciola, famadu pro sas “predas sonoras”, Sciola at ischidu aunire iscultura e mùsica, revertinde su granitu in istrumentu chi bogat a fora sonos armonicos cando est percossadu. Sas òperas suas, ispartas in totu sa Sardigna e in su mundu, festant sa natura e sas raighinas culturales de s’ìsula, fundinde materiales locales cun una poetica universale.

Zuseppe Biasi, pintore e illustradore, Biasi at contadu sa Sardigna a mesu de friguras prenas de colore e vitalidade. S’arte sua acciappat costùmenes, traditziones e bistas de s’ìsula, torrende·las a interpretare cun d’unu istile chi aunit folclore e modernidade. Sas òperas suas ant dadu unu contribbudu po fàghere connòschere sa Sardigna a foras de sas lacanas suas, influentzande ingendras  de artistas locales.

Maria Lai, artista in medas campiles e ghia de s’arte tessile de oe, Maria Lai at isichidu  revertire su filu e su pannu in istrumentos de issida de fortza  poètica manna. Sos tribaglios suos, a bortas partetzipativos e fatos pro unu logu ispetzìficu, intritzant sa memòria cumone de sa Sardigna cun d’una limba universale. Francu Bussu, intre sos printzipales de s’iscultura e de sa pintura sarda de su Noighentos, Francu Bussu at aunidu rigore tènnicu e fundaria comunicativa. Sas òperas suas iscoperrent temas ligados a su connottu, a sa religione e a sa vida de campagna  de s’ìsula, ma cun d’una
sensibilidade de oe chi los faghet divennere in manera istravanada modernos.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”