Sa Dinamo Bancu de Sardigna patit sa secunda derrotta una fattu de s’attera in sa fase duos de sa Europe Cup, perdinde 76-83 cun sos frantzesos de Le Portel, in d’una partida giogada e pattada po casi tottu su tempus, ma chi est bistada detzisa in sos urtimos minutos .

Po sos tattaresos un’attera occasione perdida pustis de su passu falsu contra Bilbao, ma sas isperantzias de si qualifficcare addurant bivas. S’isquadra de coach Markovic si est presentada in Le Portel cun determina, mustrande dae sos primos minutos de podere cumpetere in manera chitta cun sos frantzesos.

Sa gara est bistada bilantzada in sas primas tres partes, cun sas duas isquadras chi sunt bistadas a su cumandu una fattu de s’attera chentza mai si che andare a daenanti. Sa terza parte si est serrada cun sos merese de domo a daenanti solu de unu puntu(61- 60), dassande suspentare una parte finale intzerta e chertadora.

In s’urtima parte, peròe, sun bessidas a pizzu sas difficultades de sos tattaresos, mescamente in s’attaccu. Mentres Le Portel at pottidu contare supra sas prestassiones istravanadas de Konate, Diawara e Nunge, sos tattaresos ant fatigadu a acciappare continuidade. A battoro minutos dae sa fine, sos frantzesos ant approffittadu de carchi sbeliu de sa deffensa de sa Dinamo po allonghiare.

Bell’ e chi custu, sa Dinamo no at mai molladu. Sos tiros de tres puntos de Veronesi e Fobbs, su menzus marcadore tattaresu cun 12 puntos, ant torradu a azzendere sas isperantzias de sos istranzos, chi sunt arrivados a -4 puntos. A donzi manera, in sos momentoz detzisivos, Le Portel at mustradu una frittesa e fortesa pius mannas, serrande sa gara cun su risurtadu de 83-76 conchistande duos puntos pretziosos in sa cursa po si qualifficare.

Mancari eppat perdidu, sa Dinamo at mustradu signales de corazzu. S’isquadra at gherradu a sa chitta contra unu cuntrariu de livellu artu, evidentziande tramas de giogu bonas e impignu mannu, ma est mancada, in sos momentos pius importantes, una cosa supra sa cale coach Markovic at a teppere tribagliare. Sa fase de s’attaccu in s’urtima parte de sa gara, in manera particulare, at evidentziadu una mancantzia de lutidade, mentres in sa defensa si sunt bidas mancantzias chi ant permittidu a sos frantzesos de approffittare de situassiones de favore.

Cun duas derrottas in duas garas, sa Dinamo est como in d’una posissione cumplicada , ma su caminu po passare sa muda benidora no est cumpromissu. Ant essere de fundamentu sos impignos pius accurtzos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Instagram disaffiat TikTok: in sas Istorias como si iscurtant sas cantones de Spotify.

Instagram artziat su tiru in sa cumpetissione cun TikTok e introduit una funtzionalidade nova pensada po revolussionare sa manera in sa cale si iscurtat e si iscoberrit musica supra sa base. Dae oe, in sas Istorias at essere possibbile iscurtare un’anticipu de sas cantones cundivisas dae Spotify, derettu intro de s’app. Fintzas a como, chie cundividiat una cantone si depiat accuntentare de unu link mudu: po l’iscurtare, bisonzaiat bessire dae Instagram e abberrere Spotify.

Cun custa novidade, s’esperientzia divenit meda pius lorina e intzididante, siat po chie pubbricat chi po chie abbaidat. Sos clientes ant a podere iscoperrere cantones novas in manera pius lestra, chentza interrussiones o coladorzos annuntiles, favoressende un’impittu pius attuativu e affundante de sa base. Su cambiamentu s’insertat in d’unu progettu pius mannu dae parte de Meta, chi puntat a revertire Instagram in d’unu hub culturale e musicale beru e propriu. Solu pagas chidas passadas, difattis, fit bistada introduida una funtzione simile po sas Notas, sos azzorronamentos
curtzos de istadu, chi podent biere solu sos amigos pius istrintos.

S’intentu est cussu de rendere sa musica parte de fundamentu de s’esperientzia de donzi die de sos clientes, a sa mattessi manera de fottos, videos e nuntzos. Sa mossa puntat puru a affortigare sa cumpetissione de Instagram in sos cunfruntos de TikTok, chi dae annos giogat unu rolu tzentrale po
favoressere sa musica, influentzande sos gustos de sas ingendras novas e dande unu contribbudu a su sutzessu mondiale de medas hits. Cun s’unione
deretta de sas antitzipassiones musicales, Instagram proat a columare cussu disvariu e a si retagliare unu rolu pius faghidore in s’iscena musicale digitale.

In pius de sas novidades ligadas a sa musica, Instagram at abbisadu chi intro de s’annu ant arribare meledos novos po adattare sas Istorias e sos Reels. Cun custa funtzionalidades, Instagram cunfirmat sa voluntade sua de si revertire addia su simple social network fottografficu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22