In vista de sas festas de Nadale, Aeroitalia abbisat un’initziativa importante meda po rispondere a sa dimanda de collegamentos dae sa Sardigna a sa terra frimma chi est importante meda. Sa Cumpanzia, chi operat in sighidura de s’iscrocca, at programmadu 22 bolos in pius po su tempus de Nadale e incumintzu de annu, garantinde pius atzessibilidade e comodidade a sos biatzadores.

Sos bolos in pius sunt sas trattas MilanoLinate- Casteddu e Roma Fiumucinu-Casteddu. Supra sa prima tratta sunt bistados postos doighi collegamentos novos, mentres in sa secunda deghe bolos in pius. Importantes meda ant a essere sos duos bolos istravanados chi bi ant essere supra sa linia Milano Linate-Casteddu in sas dies de chenapura 20 e sapadu 21 de Nadale, cando si registrat sa parte pius manna de sas tuccadas.

Sa cumpantzia aerea at in pius at dillindadu chi s’offerta tiat podere essere ammanniada de pius commente ant a arrivare sas prenotassiones. S’intentu de custu potentziamentu est de rispondere a sa dimanda semper pius manna de s’ispostare in su mentres chi bi sunt sas festividades, apparande una solutzione cufforme a famiglias, turistas e residentes chi cherent passare sas festas de Nadale e su primu de s’annu in Sardigna o in sa terra frimma.

Sa continuidade de s’iscrocca, in custu cuntestu, si cunfirmat de fundamentu po una regione insulare commente sa Sardigna, inube sos collegamentos aereos sunt s’unicu mesu po binchere sas barras geograficas e mantennere fachidores cun tottu su restu de s’Italia. In su mentres de sas festas, in manera particulare, s’arrivu de sos turistas e sa torrada de medas emigrados narant chi est essentziale un’affortigamentu de sas trattas disponibbiles.

S’aumentu de sos bolos programmados da Aeroitalia respundit non solu a sa netzessidade de rispondere a sa dimanda, ma fintzas de minimare sa pressione supra sas prenotassiones, iscansande situatziones de dimanda arta e paga disponibilidade. Po sos biazadores, custu si traduit in d’una moddesa pius manna e possibilidade de ordiminzare sas trammudas insoro chentza difficultades.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22