A pagas dies dae sa sententzia chi at cundennadu Filippo Turetta a sa galera a bida po su mortoriu de Giulia Cecchettin, un’òpera de arte carriga de emossione e signifficu est bistada fatta in sa plaja de Platamona, in su comune de Tattari. S’artista Nicola Urru at bolidu dedicare a sa zovana chi est bistada morta, una decorassione de rena, cona de memoria e reflessione.

Sa figura, chi est manna casi 20 metros quadrados, affigurat Giulia Cecchettin ei sa mama in d’unu abbratzu chi cummovet, arricchidu dae sa presentzia de duas alas de anghelu. Sa figura si ispirat a una fotograffia chi su babbu de Giulia, Gino Cecchettin, aiat pubbricadu supra sos social.

Sa decorassione, chidrina e destinada a s’ isfaghere cun su passare de su tempus, mandat unu nuntzu poderosu meda, evidentziande sa debilesa de sa vida e su bisonzu de preservare s’ammentu de chie est bistadu mortu in manera gai inzusta. Nicola Urru at seperadu de accumpanzare su zestu artisticu suo cun d’unu posta supra sos social, mentovande sas paraulas de Elena Cecchettin, sorre de Giulia.

Custu ammunimentu ponet s’attentzione supra una realidade chi medas bortas est innorada: sa violentzia chi isfocat in su mortoriu de una femina, est solu s’urtimu attu de una cadena de malusantzias, mudores e mancantzias dae parte de sa sotziedade.

No est sa prima borta chi Nicola Urru usat s’arte commente mesu po mandare nuntzos de indilighimentu. Sas opera suas, fattas semper cun materiales chi durant pagu commente sa rena, si annodittant po sa capatzidade de revertire bistas naturales in logos de meledu cumone. Sa decorassione de Platamona est bistada fatta in conditziones diffitziles: abba e temporadas ant affartadu sa Sardigna in custas dies, ma s’artista at approfittadu de un’asseliu curtzu de su tempus malu po accabbare s’opera sua. Custu zestu, chi est bistadu pius de signifficu po sas difficultades de su tempus malu, evidentziat s’apprettu de tennere in vida s’ammentu de Giulia e de tottus sas chi sunt bistadas mortas.

S’opera de Urru no est solu una trauda, ma puru unu cumbidu a no addurare istaccados. Sas paraulas de Elena Cecchettin e s’effettu bisivu de sa decorassione manna supra sa plaja, ispinghent a unu meledu pius fungudu supra sa responsabbilidade de donzunu in su cuntrastu de sa cultura de sa violentzia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22