Su casu de su mortoriu de una femina chi at abbolottadu Casteddu e sa comunidade de Santu Sperau at tentu isviluppos novos: Igor Sollai,43 annos, at addurare in presone pustis de sa detzisione de sa Corte de Cassazione chi at reffudadu sa dimanda de torrare a detzidere supra sa bardia in presone.

Sollai est accusadu de mortoriu volontariu grave meda e de aere cuadu su corpus de sa morta, po aere bocchidu sa muzzere, Frantzisca Deidda, de 42 annos. Sa femina fit isparida su 10 maju passadu, e po pius de duos meses, s’assentzia sua aiat tentu sa comunidade in d’unu tempus de secacoro e intzertesa. Su 18 de triulas, su corpus de Frantzisca est bistadu acciappidu cuadu intro de una bussa manna in s’iscrocca in mesu de Sinnai e Santu Idu, accanta a s’istatale bezza n. 125.

Su ricursu presentadu dae sos abocados de Sollai, puntaiat a alcansare una curressione de sa detzisione de su Tribunale de su Riesame de Casteddu, chi aiat cunfirmadu sa detzisione de lu faghere addurare in presone. Secundu su Tribunale, bi fit s’arriscu chi si che poderet fuire e chi poderet alluare sas proas, addia a sos graes indissios de curpa chi zustifigant sa detzisione de lu faghere addurare in presone. Sa Cassazione, pustis de aere declaradu chi su recursu si podiat faghere at dezisu de mantennere Sollai in presone, mandande in daesegus sa dimanda de torrare a leare sa detzsione.

Su casu at evidentziadu isettos importantes ligados a sa violentzia contra sas feminas, ghiande s’attentzione de sa zente supra sos meccanismos de amparu de sas chi ant tentu problemas e supra s’importantzia de interventos a bonu puntu cando sos problemas sunt in sas domos.

S’istoria de Frantzisca Deidda est unu dramma chi at bantzigadu in manera funguda tottu sa Sardigna e addia, evidentziande sa netzessidade de ponnere in campu pius istrumentos po prevennere e perricare sa violentzia contra sas feminas.

Sa comunidade de Santu Sperau, chi aiat isperadu fintzas a s’urtimu in d’unu atteru accabbu, si est istrinta in su dolore po sa perdida de Frantzisca.

Su drammatigu accattu de su corpus suo at fattu torrare in mente a medas pessonas s’apprettu de accomettare sa violentzia in domo comente una prioridade sotziale e de sa leze. Sa presonia de Sollai benit cunsiderada una passada importante in su protzedimentu giudissiariu, ma su dolore po cantu est sutzessu at dassadu unu sinnu chi non si podet iscantzellare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”