Cussa lepiesa chi naschet dae su coro e si traduidi in donzi movimentu de su corpus, est sa fortza chi at ispintu duas zovanas atletas, Rebecca Pitzianti e Greta Teng, assa parte de unu risurtadu istravanadu. Seighi annos, ambasduas campionas de Pole Dance, sunt partidas dae sa palestra insoro de Sestu, un’angulu pitticcu de su mundu, po arrivare fintzas a Uppsala n Svezia, inube ant conchistadu sa medalla de arghentu in sa categoria Artistic Pole Junior Double, a sos campionados de su Mundu de Pole Dance.

Unu sutzessu chi at premiadu su tribagliu tostu, sa passione e su talentu, e chi at bidu puru Rebecca conchistare su quartu postu in sa categoria Artistic Pole Junior Mixed, unu risurtadu desampladu.

Su percursu chi che at giuttu sas duas zovanas atletas a che pigare supra su cataffale est bistadu sinzadu dae meses de allenamentos cadrios,sacrifitzios e una passione chi las at unidas comente una fortza chi non si biede ma chi est poderosa. Su segretu insoro? Sa lepiesa chi ponent in donzi movimentu, comente cussa de una fozza chi ballat in su bentu.

Cussa mattessi lepiesa, chi prima de tottu naschet in su coro, e at rendidu donzi movimentu insoro naturale, cadriu e delicadu. Rebecca e Greta ant ischidu trasformare sa fadiga in d’una arte chi at faeddadu deretta a su coro de su pubbricu.

S’allegria po su risurtadu segudadu est evidente in sas paraulas de sas duas atletas. Rebecca chi est emossionada, ammentat s’intensidade de s’esperientzia bivida in Uppsala: sa felicidade de pigare supra su cataffale, ma puru sa bellesa de biere medas ballarinas postas impare po unu accadessimentu chi at fattu divennere su mundu de sa Pole Dance un’ispettaculu mannu e internatzionale. Greta, dae parte sua, evidentziat cantu siat bistadu istravanadu de ballare impare a sa cumpantza sua de isquadra, cun d’unu armudiu chi at fattu divennere sa mustrada insoro meda pius potente.

S’ispettaculu che che las at giuttasa a su sutzessu est bistadu un’ammisturu de impignu, creatividade e tennica. Unu contu de fortza e grassia, in su cale Rebecca fit una tigre e Greta sa domadora sua, una mataffara chi reflettit s’intesa de sas duas atletas e s’ecchilibriu perfettu de sa potentzia e sa dilighesa. Custu intritzu de fortza e armudiu at conchistadu sos zuighes, ma fintzas su pubbricu chi at sighidu cun s’alenu suspesu donzi movimentu. Bellecchi sa timidesa chi annoditat sa manera de faeddare de su sutzessu, supra su cataffale Rebecca e Greta ant mustradu corazzu, determina e un’intesa funguda chi at dadu vida a una proa unica.

Sa preparatzione est bistada longa e letrancosa: oras passadas a mezorare donzi movimentu, donzi filera, donzi particulare, po creare una proa chi esseret pius de una simple mustrada. Greta, difattis, evidentziat cantu esseret importante po issas chi s’ispettaculu no esseret solu una mustrada de abilidade fisica, ma un’opera de arte chi tepiat resessere a comunicare s’essentzia de sa Pole Dance: unu ballu chi non si allindat a essere fisicu, ma chi est unu beru e propriu viazzu emotzionale. E bi sunt resessidas, trasmittinde a su pubbricu e a sos zuighes sa bellesa de s’arte
insoro, fatta de lepiesa e fortza.

Su biazzu a Uppsala no est solu s’istoria de unu sutzessu isportivu. Est unu esempiu de comente sa passione, sa determina e su corazzu si potant trasformare in arte,ispirande chie tenet su corazzu de sighire sos sonnios suos, fintzas cando su percursu paret diffitzile e incertu. Rebecca e Greta, cun sa passione insoro po sa Pole Dance, ant mustradu chi donzi zestu, si benit fattu cun su coro, podet divennere unu bolu in derettura de sa bittoria, unu bolu chi non si frimat a sa gara, ma chi abbratzat sa bellesa e sa potentzia de su ballu.

Su sutzessu insoro in Uppsala no est solu unu puntu de arrivu, ma una testimonia de comente su ballu, in pius de essere una forma de espressione fisica, est puru unu viazzu de su coro, inube donzi movimentu contat un’istoria e inube s’intesa de duas animas podet revertire donzi movimentu in d’unu bolu in derettura de sa bellesa e sa bittoria.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Masainas,disgarriga abbusiva e tribagliadores chena cuntrattu in d’una ditta de massajos: denuntziadu un’impresariu.

Una disgarriga abbusiva, tribagliadores chena cuntrattu e fura de currente. Est cantu ant iscopertu sos carabbineris in su mentres de compudos in d’una ditta de massajos de Masainas. S’operassione st bistada fatta cun s’accottu de paritzas setziones e s’azzudu de unu elicotteru de Elmas, chi at boladu supra sa zura in su
mentres de sos controllos. Controllos chi sunt bistados ordiminzados po abberguare su rispettu de sas lezez ambientales, de su tribagliu e de sa siguresa in sas dittas de s’iscrocca.

Sos controllos si sunt cuncentrados supra sos terrinos de una sotziedade de massajos de un’omine de 53 annos. In su mentres de sos controllos, sos carabbineris ant incumintzadu a controllare istrutturas, impiantos e attividades presentes in sa zura. In su mentres de sos atzertamentos est bessidu a pizu chi s’omine impittaiat sa retza elettrica chentz cuntrattu. Sa ditta fuit collegata a sa currente chena autorizzassione, impittandela chena la pagare. Pro custu motivu est partida fintzas s’accusa de furtu aggravadu de currente.

Sighinde cun sos controllos, sos carabbineris ant acciappidu fintzas unu motocoltivadore furadu, chi fuit de propriedade de un’atteru imprendidore de sa zura chi nde aiat denuntziadu su furtu. Est iscattada fintzas sa denuntzia po ricettassione. Sa zura de sa laurantza si presentaiat in cundissiones malas. Secundu canto ant cunfirmadu sos militares, una parte de sos terrinos fuit bistada revertida in d’una disgarriga manna chena autorisassione. Intro de sa zura sunt bistados acciappidos arreffudos ispetziales e cosas perigulosas po s’ambiente.

A s’omine sunt bistadas cuntestadas paritzas macchiscias: controllu illetzidu de arrefudos, disgarriga abbusiva, de aere brusiadu illetzitamente arrefudos, iscarrigos de fauda chena autorissassione e de aere fattu autodemolizione chena nde tennere s’autorissassione. In su mentres de sos controllos est bessidu a pizu fintzas un’atteru probblema, ligadu a sa defensa de sos tribagliadores. Intro de sos amparos de sa ditta sunt bistados acciappidos duos tribagliadores chena cuntrattu.

A s’accabbu de s’operassione tottu sa zura est bistada secuestrada po prevensione, imparis a sos materiales e mezzos acciappidos in su mentre de sos controllos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22