Accadessimentu novu de violentzia contra su personale de sa sanidade de Casteddu. Custa borta, est torra sutzessu in s’Ispidale Santissima Trinidade, inube dominica sero est accadessida un’attera situassione grave meda, chi at interessadu unu malaidu chi fit istraccu de ispettare sa muda sua in sa sala de isettu de su prontu succursu. S’omine, chi aiat perdidu sa passentzia po s’isettu, at incumintzadu a intzugliare e minettare cun sas paraulas, sos duttores e sos operadores sanidarios presentes, creande unu tempus de tesone manna e de timoria.

Bell’ e chi sas minettas esserant fattas cun sas paraulas, sa situassione fit dileniande in presse fintzas a s’arrivu lestru meda de sa politzia. Bell’e gai, s’omine de 52 annos non si est calmadu mancu cando at bidu sa politzia: a su contrariu, secundu sas accusas, at sighidu a abboghinare e at chircadu de affraccare su personale sanidariu, aggravande de pius su comportamentu suo. Pustis de unu cunfrontu tesu, s’omine est bistadu arrestadu cun s’accusa de minettas e tentada affraccada a sos operadores sanidarios. In pius de custu, at a teppere rispondere fintzas de s’accusa de interrussione de servitziu pubbricu.

Custu accadessimentu si aggiunghet a una filera longa de affraccadas contra su personale de s’ispidale casteddaggiu, chi paret no connoscat asseliu. Solu pagas dies prima, giovia passada , un’operadore sanidariu de su rampu de maladias de appestamentu fit bistadu affraccadu un’attera borta. In custu casu, unu malaidu, chi non fit cuntentu de sas curas chi li aiant dadu, si fit arrenoadu in manera fogosa, ispinghinde s’operadore sanidariu e arrivande puru a li dare unu ciaffu.

In daenanti a custu accreschimentu de violentzia, sos sindacados ant ghettadu unu appellu nou e accoradu a sas autoridades e a sa zente:” Sas difficultades sunt creschinde e sa situassione est divennida grave meda. No si est faghinde nudda de pretzisu po diffendere sos tribagliadores de sos ispidales, chi donzi die si acciappant a tribagliare in cundissiones semper pius diffitziles. Nisciunu tiat teppere andare a tribagliare timinde de essere affraccadu o, ancora peus, cun sa timoria de no podere torrare a domo dae sos caros suos”.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22