S’iscola sarda si preparat a bivere un’annu iscolasticu riccu meda de novidades, cun s’arrivu de 1.400 mastros novos intro de su mese de Nadale 2024. Un’innietzione de fortzas friscas chi at affortigare meda s’istruttura de sas iscolas de s’Isula, rispondinde gai a sas esigentzias de firmesa e calidade de su métodu.

De custos, 893 mastros ant arrivare gratzias a sos cuncursos finantziados dae su PNRR, chi si sunt concruinde propriu in custos meses. Su PNRR si cunfirmat unu pilotto de fundamentu po s’ annoamentu de su sistema iscolasticu italianu, e sa Sardigna non faghet eccessione. Intro de su 10 de Nadale 2024, difattis, si prevedid s’assuntzione de 893 mastros chi ant binchidu sos cuncursos finantziados dae su PNRR.

Custos mastros novos ant a leare servitziu giai in su mentres de s’annu iscolasticu 2024/2025, contribbuinde a minimare su problema cronigu de personale e garantinde unu mezoru in sa calidade de s’insinzamentu. Sas ammissiones a rolu tiant podere giughere su numeru totale de sos mastros novos a tempus deffinitivu po cust’annu, fintzas a 1.392 unidades, una tzifra chi mustrat un’aumentu mannu in cunfrontu a sos annos passados.

In pius de sos mastros assuntados a tempus deffinitivu, bi ant essere puru 104 cuntrattos a tempus subrasseidu, chi si tiant podere trasformare in rolos firmos cando at a finire s’annu de proa. Custos cuntrattos ant essere
fattos pius che atteru po sos mastros de accottu, una figura de sa cale bi est semper pius dimanda in sas iscolas sardas e chi, gratzias a custas assuntadas novas, at a biere s’insertu de 168 mastros novos cualifficados.

Custu affortimentu de s’istruttura de accottu est unu passu de fundamentu po garantire un’assistentzia cufformada a sos dischentes chi tenent bisonzu de s’educassione ispetziales e mezorare s’inscluisione in s’iscola. Non solu su PNRR, ma puru sos cuncursos fattos prima ant a contribbuire a accreschere su numeru de sos mastros. Intro de su 2024 ant essere assuntados, cun incumintzu dae su primu de capudanni 2024 e leande servitziu dae su primu de capudanni 2025, sos chi ant binchidu su cuncursu de su 2020.

Custu giru novu de assuntadas si at a faghere supra postos in pius autorizados po faghere bintrare in rolu e supra possibile postos francos dassados dae chie at renuntziadu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Est creschinde sa protesta de sos casi 650 duttores e arrezentes de s’Arnas Brotzu de Casteddu. In su mentres de s’addobiu de oe, est bistadu dezisu de prorogare s’azzitassione, puru po s’assentzia de s’assessore regionale a sa Sanidade, Armando Bartolazzi, chi aiat po primu proponnidu s’addobiu ma pustis non si est presentadu po aere tentu atteros impignos.

Un’addobiu nou si prevedid po su 18 de custu mese. In su mentres, sos duttores ant comunicadu a s’assessore, a sos arrezentes de s’Arnas e a su prefettu sa detzisione insoro de non faghere oras de tribagliu in pius dae cantu prevedit su cuntrattu(34 oras a chida pius 4 oras de azzorronamentu proffessionale), e de reffudare s’istravanadu e sas prestassiones annuntiles. Ant fintzas amminettadu un’iscioberu de tottu su personale sanidariu de s’Arnas Brotzu si non si at agattare una soluzione.

“Semus s’ispidale pius produttivu de Sardigna po prestassiones eppuru semus avariados accolomicamente, cun disponibilidade pius bassa in cunfruntu a su restu de sa Sardigna”, ispiegat Luigi Mascia, presidente in Sardigna de Cimo Fesmed. A s’addobiu ant partetzipadu tottu sos sindacados, fintas cussos de sos operadores de sa sanidade. Sos duttores denunziant chi sa protuttividade media de donz’annu po issos est de casi 500 euros, mentres po sos collegas de atteras ASL de sa Sardigna, si arrivat fintzas a 8.000 euros.”Semus pagados pius pagu meda in cunfruntu a sos atteros, eppuru sustennimmos cun su chi faghimos in pius puru sas atteras ASL chi in custu momentu sunt accomettande difficultades graves.”

Sos dipendentes dimandant s’appricu de sa leze 1 de su 2023, chi prenettait s’istantziamentu de deghe miliones de euros po abbilantzare sos fundos chi serbint po sas ASL. In su mentres chi s’ispettat un’atteru addobiu novu cun s’assessore, s’azzitassione addurat semper in campu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22