In sos urtimos annos, sos buscos de sa Sardigna ant tentu dannos mannos po more de medas fattores contrarios, in mesu de sos cales bi est s’assuttura longa meda, sos attaccos de corduios chi battint maladias e su cambiamentu de su tempus. Custa crisi de s’ambiente, connoschida commente” maladia muda”, chi est appenande sos buscos nostros e est attirande s’attentzione de Forestas, s’organissasione de sa regione chi est dedicada a sa protessione de su patrimoniu de sos buscos. S’istudiu de Forestas, pesat preguntas fortes supra sa capatzidade de resistentzia de sos ecosistemas de sos buscos sardos e supra sa balidìa de sas protessiones chi sunt bistadas fattas.

Assu contrariu de cantu ant nadu sos criticos, no andat bene narrere chi non benit fattu nudda po sarbare sos buscos. Forestas dae tempus meda est controllande sos buscos e sos prantarios chi sunt sutta de su controllu suo. Custas attividades si faghent po recollire datos importantes meda supra sa presentzia e sa diffusione de orduios chi faghent dannu, cun un’attentzione particulare a su genere Phytophthora. Custos corduios, chi faghent frazigare, minettant in manera grave sa salude de sas mattas. Su controllu, chi sighit dae paritzos annos, faghet parte de un’isforzu de donzi die e controlladu po accomettare custos problemas in manera pius manna.

Sos cambiamentos de su clima influentzant meda sos buscos sardos, bessinde a campu cun tres minettas graves: Arbules siccos, fogos e unu creschimentu de sa possibilidade chi potant essere attaccados dae sos
corduios. Custos fattores sunt apprettande sa ruina de sos buscos, chi si podent biere in manera particulare in su Sarrabus, Gerrei,Ozzastra, in su parcu naturale de Gutturu Mannu, in su monte Linas e in Gaddura. S’assuttura longa illaunit sas mattas, e las faghet divennere pius revistas a sos attaccos de sos corduios , minimande sa capatzidade insoro de resistire a sos fogos. Custu protzessu creat unu rogliu vissiosu chi compromittit de pius sa resistentzia de sos buscos, faghindelos divennere semper pius chidrinos e debiles. Sa situatzione preoccupat meda pro itte custa “maladia muda” non est laccanada a una sola ala de s’isula.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22