In sa sala de sos libros de su Palattu Apostolicu, Paba Frantziscu at retzidu in audentzia privada Beniamino Zuncheddu, su pastore sardu chi at passadu 33 annos in presone, cundennatu cun inzustissia po aere bocchidu tres pessonas. Solu su mese de bennarzu passadu, Zuncheddu est bistadu assoltu in su protzessu de revisione, chi at fattu finire una de sas mudas pius dolorosas e chentza zustissia de sos urtimos tempos in Italia.

Arrestadu a solu 26 annos, Zuncheddu est bessidu dae presone a s’etade de 60 annos, giughinde supra de issu su pesu de 30 annos de sufferentzia. Intames, s’istoria sua no est solu cussa de un’omine chi at tentu un’inzustissia, ma puru cussa de una fide chi non podiat ruere e de una fortza istravanada. In su mentres de s’incontru cun su Paba, Zuncheddu at donadu una copia de su libru iscrittu paris cun s’abocadu suo, intitoladu:”Deo so innozente”. In cust’urtimu libru, contat s’esperientzia dolorosa sua in daesegus de sas traessas, passada in tres presones divressas, medas bortas in cunditziones urtimas, commente sa vida forzada cun atteras undighi pessonas intro de una tzella pitticca meda.

Mancari sas cunditziones de vida esserent tostas meda e sas porfias de donzi die, in mesu de sas cales sa mancantzia de logu po drommire e sas difficultades puru po si samunare, Zuncheddu non at mai perdidu s’isperantzia. In su mentres de sa muda sua bessit a pizu su retrattu de un’omine chi, mancari provadu dae s’inzustissia, at ischidu acciappare sa fortza in sa fide e s’amore po sa famiglia sua, chi at sighidu a lu agguantare fintzas in sos momentos pius diffitziles. Custa fide li at permittidu de iscampare e de divennere una figura de fentomu fintzas po chie, in presone, viviat situatziones peus de sas sua. In su negotziu cun su Paba, Zuncheddu at cundivisu su percursu de perdonu chi at incumintzadu. At contadu commente, mancarsu su dolore e s’inzustissia chi at tentu, siat resessidu a perdonare cussos chi lu aiant accusadu in manera farsa, faghindeli retzire una cundenna chi non fit zusta.

Unu perdonu chi no est bistadu fatzile, ma chi at acciappidu raghinas artas in sa fide sua. S’istoria de Beniamino Zuncheddu ponet dimandas artas supra sa debilesa de su sistema de sa zustissia e supra sas
cunseguentzias devastantes de unu errore de sa zustissia. Ma est fintzas una testimonia de commente sa fide e su perdonu potant iscampare e frorire puru in sas occasiones pius diffitziles.

Attività realizzata col contributo della Regione Sardegna — IMPRENTAS
2023-2024. LR 22/2018, art. 22

Unu babbu in Siliqua, at fattu un’attu istravanadu, seperande de perdonare su fizu de bindighi annos in daenanti de tottus, chi lu aiat abbulteddadu a su tzrugu in d’una briga intro de sa macchina. S’accadessimentu tragicu est capitadu po unu momentu de tesone in famiglia, chi est finidu cun d’una reatzione fogosa de su zovanu, ma cussu chi at fartadu de pius est bistada sa reatzione de su babbu.

Cun d’unu post supra de Facebook, s’omine at cherfidu cundividere non solu su dolore fisicu e s’emossione po s’affraccada, ma mescamente su sentimentu de amargura profunda po s’assentzia de su fizu, espressande cun paraulas chi toccant su coro s’attibbitzione sua e su disizzu de appaghiamentu.

“Mi faghet pius male chi tu non che sias de cussu chi mi as fattu”, at iscrittu su babbu, cun d’unu limbazzu simple ma prenu de emossione. Su riferimentu a s’assentzia de su fizu reflettet unu dolore pius fungudu cunfrontadu a sa ferida fisica: sa distantzia e su de aere isfassadu sue de essere in bonas cun su fizu. Luego pustis de s’affraccada, s’omine che lu aiant leadu in presse meda a s’ispidale, inube aiat deppidu essere operadu po sa ferida a su tzrugu. Bell’e gai, mancari s’arriscu e sa sufferentzia fisica, su babbu at seperadu de no si cuncentrare supra sa violentzia, ma pius supra de s’amore.

In sa dichiara sua, prena de affettu e perdonu, s’omine at fintzas cherfidu evidentziare chi, cale si siat cosa esseret accadessida, issu tiat essere adduradu accanta a su fizu. “Bellecchì tottu su chi est sutzessu, appo essere semper cun tegus”, at promittidu, in d’unu sinzale craru de dedissione dae parte de unu babbu e de amore chentza limides. Su perdonu offertu no est solu un’attu de attibbitzione, ma unu imbidu a tappulare unu ligonzu segadu, a torrare a tennere una relata chi, mancari s’attu drammatigu, s’omine creet potat essere recuberada. In su nuntzu pubbricu, su babbu faghet cumprendere de disizzare abberu de binchere su chi est sutzessu e de podere torrare a abbratzare su fizu.

“As a biere chi ammos torrare a nos addobbiare”, iscriet, cun d’una promissa chi andat addia su perdonu de su momentu, indittande unu tempus benidore in su cale babbu e fizu si potant appaghiare e sanare imparis dae sas feridas, non solu fisicas ma fintzas de s’emossione. Custu nuntzu est prenu de una voluntade forte meda de torrare a fraigare e de non si dassare distruere dae su dolore.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22