Sa pius reghente edissione de su Palu de Siena at tzimentadu de pius su ligonzu istravanadu chi unit sa Sardigna e s’istorica tzittade toscana.

Evidentziande s’eccellentzia de sos pesamentos de sos caddos e s’abbilesa de sos curridores sardos. Custu ligonzu, giai forte gratzias a sa presentzia de caddos e curridores chi arribant dae s’isula, est bistadu affortigadu de pius dae sa binchida de Dino Pes, connoschidu commente “Velluto”, chi at conchistadu po sa prima borta sa gloria senesa,caddigande Benitos po sa cumarca de sa Lupa.

Sa binchida de Velluto, chi arribat dae Silanus, est bistada puru pius de signifficu dae sas occasiones particulares chi ant evidentziadu custa edissione de su Palu. Prenettadu po su 16 de austu, su Palu de s’Assunta est bistadu dispacciadu po more de su tempus malu. Intames, mancari bi esserent pensamentos ligados a su tempus, sa cursa si est fatta in manera regulare gratzias a su tribagliu de sos dipendentes de su comune de Siena, chi fintzas dae sas primas oras de su manzanu ant tribagliadu po garantire chi sa preda sealza de sa plata esseret in cunditziones bonas.

Sa Sardigna at tentu unu rolu de interprete puru po sa presentzia manna de caddos anglo-arabos pesados in s’Isula e po su numeru mannu de curridores sardos in gara. Tottu sos deghe caddos chi ant cursu, arribaiant dae pesamentos sardos, e custu mustrat s’eccellentzia de su pesamentu de sos caddos de s’Isula, chi como est reconnoschida a livellu naztionale.

In pius, ses de sos deghe curridores chi ant partetzipadu a sa cursa arribaiant dae sa Sardigna, e custu testimonzat s’importantzia chi tenet sa Sardigna in su Palu de Siena. Su sutzessu de sa cumarca de sa Lupa e de Dino Pes, est una binchida non solu po su curridore e sa cumarca sua, ma po tottu sa Sardigna, chi si cunfirmat commente una de sas Regiones crae po su Palu de Siena. Su connottu e s’eccellentzia de sos pesamentos sardos, impare a sa balentìa de sos curridores de s’isula, ant un’attera borta illustradu custa antiga cumpetissione, tzelebrande unu ligonzu chi sighit a creschere e a si affortigare in su tempus.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Carrelas serradas, proibbissiones de arressada e zuras de su tzentru off limits: Nuogoro si approntat a sa bisita de su Presidente de sa Repubblica.

Nugoro si approntat a accollire su Presidente de sa Repubblica Sergio Mattarella e lu faghet cun d’unu pianu de organizassione mannosu chi prenettat carrelas serradas, proibbissiones de arressada e paritzas zuras de su tzentru de sa tzittade off limits po garantire sicuresa e ordine pubbricu.

Su Capu de s’Istadu est isettadu in s’isula po sos chentu annos de su premiu Nobel de Grassia Deledda, affussione de balore istoricu e culturale istravanadu po sa Sardigna e in manera particulare pro Nugoro.

Su Presidente Mattarella at arribare in Nugoro po intzidire a sas tzelebrassiones uffitziales dedicadas a s’iscrittora nugoresa, unica femina italiana chi at binchidu su Nobel po sa Litteradura. Su programma de sa visita sua prenettat una arressada a su Teatru Eliseo, inube bi at essere unu mamentu istitutzionale tzentrale de sa zoronada, e prus a tardu una bisita a sa domo-museo de Grassia Deledda, logu frigura de sa memoria e s’identidade culturale de sa tzittade.

Isettande s’arrivu de su Capu de s’Istadu, su Comune at preparadu unu pregone chi cambiat sa passada in manera de signifficu. In sas oras prima e in su mentres de sa bisita, bi ant essere proibissiones de arressada in sas carrelas in sas cales at a colare su curteu presidentziale e in sas zuras accanta a su Teatru Eliseo e sa domo- museu. Carchi carrela de su tzentru at essere serrada a su traffigu po carchi mamentu, mentres atteras zuras dislindas ant essere serradas fintzas po sos chi andant a pe po permittere chi sos appuntamentos istitutzionale si pottant faghere in siguresa.

Affortigadas sa mesuras de siguresa cun s’interventu de sa Prefettura, Questura e de sa politzia. Si prenettant controllos,travessas e politzia in sas zuras diligas de sa tzittade. S’intentu est cussu de garantire una bisita sigura,allindande meda sas discumbenias po tzittadinos e mercaderis, chi sunt bistados informados dae tempus de sas modifficas de sa circulassione.

Sa presentzia de Sergio Mattarella est unu mamentu de braga manna pro Nugoro, chi si approntat a tzelebrare una de sas friguas suas prus e importantes. Sa tzittade bivet oras de isettu e fermentu: iscolas,assotzios culturales e istitutziones sunt interessadas a ordiminzare sos abbenimentos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22