Una giovana de 20 annos, naschida in Napoli, at postu in essere una truffa aguda chi li at fruttadu 300.000 euros, in dannu de una femina de 94 annos chi bistat in Casteddu. Sa mariola at usadu una tennica bene connoschida, chi giamant de su” fintu carabinneri”. In custu casu at giammadu a su telefono sa femina betusta, faghindeli creere chi sa nepode fit bistada arrestada e chi po la dassare andare bisonzaiat de pagare una fiantzia derettu.

Mannedda, chi, preoccupada po sa sorte de sa nepode, at cussinnadu 2.000 euros in contante, impare a prendas de familla de unu balore istimadu in casi 300.000 euros. Custos benes pretziosos, sunt bistados fidados a una femina chi si est presentada a sa gianna de domo de sa bedusta, accabbande gai sa truffa.

Sos carabinneris de Casteddu, a pustis de sa denuntzia de sa truffada, ant fattu partire in presse sas scruccullas. Istudiande sas figuras de sa videocustodia chi bi sunt a curtzu de sa domo de sa betusta, sunt riessidos a riconnoschere sa zovana truffadora. Sa femina de 20 annos fit giai partida po Napoli, e fortzis pensaiat de essere in logu seguru.

Intames, gratzias a s’azzudu lestru de sos carabinneris de Casteddu e cussos de Napoli, sa zovana est bistada frimmada e arrestada in su momentu chi est arrivada a su portu de Napoli e nde est calada dae sa nave. In su mentres de su cumpidu fattu sighinde s’arrestu, sos carabinneris ant acciappidu tottu su chi fit bistadu furadu, dinari e prendas.

S’operassione chi ant fattu impare sos carabinneris at permittidu non solu de assigurare a sa zustissia sa responsabbile de un’assione gai vile, ma fintzas de garantire su recuberu e sa torradura de sos benes a sa femina betusta, chi in sas dies chi ant a bintrare at a rezzire tottu su chi le che aiant furadu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su Parcu naturale de Gutturu Mannu amplariat s’offerta culturale e turistica sua cun s’abbertura de s’Ecomuseu pare-pare istoricu e archeologicu, una base digitale nova chi permittit de iscoperrere, in manera simple e lestra, sos sitios printzipales de interessiu chi bi sunt in sa zura amparada. Non solu natura limpia, duncas, ma fintzas unu patrimoniu istoricu de balore mannu chi benit in finis postu in retza e rendidu dispostu cun d’unu simple click.

Pro mesu de s’Ecomuseu, sos bisitadores podent iscoperrere in manera digitale sas iscroccas de sos comunes de Pula, Villa San Pietro, Siliqua,Domus de Maria, Uta, Assemini, Santadi, Capoterra,Sarroch e Teulada,accostandesi a una jura digitale chi contat sa ricchesa archeologica istravanada de su Parcu. Sa digitalizzazione cumprida de sos temas apparat un’esperientzia chi faghet affundare e chi attraessat s’istoria e s’archeologia de s’iscrocca, fintzas po sos temas ambientales, isfruttande tottas sas potentzialidades de sa tennologia.

Su disignu est bistadu isviluppadu dae paritzos espertos  cun s’accottu iscientificu de sa Sovraintendentzia de Casteddu e Aristanis e s’azzudu de s’Archiviu de s’Istadu de Casteddu. S’initziativa naschet cun s’intentu de balorizzare una cosa a s’ispissu pagu connoschida de sos parcos naturales e chi, in su casu de Gutturu Mannu, est unu elementu chi annodittat: sa cuncentratzione manna de testimonias chi andant dae sa preistoria fintzas a s’edade moderna e de oe, cun casi 55 sitios tzensidos intro e a lacana de sa zura amparada.

Intre sos risurtados de su disignu, curadu dae sa sotziedade Telos, bi sunt una base web dedicada chi permittit de iscumbattare s’iscrocca po mesu de testos, figuras e cartas tematicas, e videos po tamburinare. Custos temas ant a essere disponibiles puru pro mesu de unu logu intzididu postu in s’Infopoint de Pantaleo, in su Comune de Santadi, una de sas intradas printzipales de su Parcu. Gratzias a custos istrumentos at a essere possibile bisitare dae calesisiat parte de su mundu, logos de importantzia manna commente nuraghes, tumbas de zigantes e domos antigas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22