Su 2024 si est mustrande commente un’annu drammatigu po sa Sardigna, cun prus de 4.000 ettaros de buscos giai brusiados po cajone de sos fogos devastantes. In sos urtimos dies, unu fogu mannu intra Nugoro e Orune at devastadu atteros 800 ettaros de suerzu e orroeles, corpande puru sas campagnas de Orane, Benetutti e Oroteddi, chi aiant giai perdidu 450 ettaros in d’unu atteru fogu.

S’azzudu de sa macchina contra soso fogos de sa Regione, est bistadu importante meda, cun tres elicotteros lizeros, duos Super Puma e battoro Canadair, addìa su Corpus Forestale, s’Agentzia Forestas, Sa protessione Tzivile, volontarios e vigiles de su fogu. Custos urtimos ant cumbattidu contra sas frammas po duas dies una fattu de s’attera, cumbattinde fintzas a de notte. Sas operassiones de succursu los ant custrintos a movere battoro cuiles e ponnere in salvu otto pastores impare a su bestiamene insoro.

Sa situassione est prus grave pro itte mancat s’abba. Sos cadinos de s’isula sunt prenos solu a su 50%, cumplicande sas operassione po che istudare su fogu e aumentande sa debilesa de sa Regione. Sa giunta regionale at duncas declaradu s’utta de emergentzia, prevedinde atteras disponibilidades po affrontare sa siccagna.

Sas autoridades locales sunt puru chircande de affortigare sas colunas contra su fogu. S’assessore de s’ambiente, Rosanna Laconi, at detzididu de assuntare atteros 600 operadores po s’agentzia Forestas e de atteros agentes de sa Forestale. Laconi at evidentziadu su bisonzu de unu cumportamentu responsabbile de sa populatzione, pro itte medas fogos sunt acchiccados a posta.

In su mentres, un’atteru fogu custu puru acchiccadu a posta, at corpadu Usini, in su Tattaresu, accostandesi cun perigulu meda a sa forana de sa bidda. Su Corpus Forestale, chi sighit sas operassiones de istudamentu, est giai impignadu in su sanamentu e sa balutatzione de sos dannos, chi ant interessadu paritzas dittas de sas campagnas. Custa passada de fogos, addescados dae sa siccagna e dae sas temperaduras artas, est una minetta grave po s’ecosistema e s’accolomia de sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Carrelas serradas, proibbissiones de arressada e zuras de su tzentru off limits: Nuogoro si approntat a sa bisita de su Presidente de sa Repubblica.

Nugoro si approntat a accollire su Presidente de sa Repubblica Sergio Mattarella e lu faghet cun d’unu pianu de organizassione mannosu chi prenettat carrelas serradas, proibbissiones de arressada e paritzas zuras de su tzentru de sa tzittade off limits po garantire sicuresa e ordine pubbricu.

Su Capu de s’Istadu est isettadu in s’isula po sos chentu annos de su premiu Nobel de Grassia Deledda, affussione de balore istoricu e culturale istravanadu po sa Sardigna e in manera particulare pro Nugoro.

Su Presidente Mattarella at arribare in Nugoro po intzidire a sas tzelebrassiones uffitziales dedicadas a s’iscrittora nugoresa, unica femina italiana chi at binchidu su Nobel po sa Litteradura. Su programma de sa visita sua prenettat una arressada a su Teatru Eliseo, inube bi at essere unu mamentu istitutzionale tzentrale de sa zoronada, e prus a tardu una bisita a sa domo-museo de Grassia Deledda, logu frigura de sa memoria e s’identidade culturale de sa tzittade.

Isettande s’arrivu de su Capu de s’Istadu, su Comune at preparadu unu pregone chi cambiat sa passada in manera de signifficu. In sas oras prima e in su mentres de sa bisita, bi ant essere proibissiones de arressada in sas carrelas in sas cales at a colare su curteu presidentziale e in sas zuras accanta a su Teatru Eliseo e sa domo- museu. Carchi carrela de su tzentru at essere serrada a su traffigu po carchi mamentu, mentres atteras zuras dislindas ant essere serradas fintzas po sos chi andant a pe po permittere chi sos appuntamentos istitutzionale si pottant faghere in siguresa.

Affortigadas sa mesuras de siguresa cun s’interventu de sa Prefettura, Questura e de sa politzia. Si prenettant controllos,travessas e politzia in sas zuras diligas de sa tzittade. S’intentu est cussu de garantire una bisita sigura,allindande meda sas discumbenias po tzittadinos e mercaderis, chi sunt bistados informados dae tempus de sas modifficas de sa circulassione.

Sa presentzia de Sergio Mattarella est unu mamentu de braga manna pro Nugoro, chi si approntat a tzelebrare una de sas friguas suas prus e importantes. Sa tzittade bivet oras de isettu e fermentu: iscolas,assotzios culturales e istitutziones sunt interessadas a ordiminzare sos abbenimentos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22