Filippo Tortu at brilladu a sos Europeos de Atletica de Roma 2024, binchinde sa medalla de arghentu in sos 200 metros cun d’una presta chi at tentu tottus cun s’alenu suspesu. Su campione italianu at espressadu sentidos de cuntrastu supra su risurtadu, decrarande:” Un’arghentu ranchidu ma pretziosu po mi carrigare in su percursu meu. So cuntentu de aere cussinnadu un’attera medalla a custa istravanada Natzionale Italiana! Commo, tottu imparis sa conca est a sa porfia de sa 4×100.”

Custas paraulas, pronuntziadas cun d’unu misciu de amargura e determinu, mustrant su carattere de cumpetissione e sa dedissione de Tortu.

Tortu, cun su tempus de 20”41, est arribadu secundu, pustis de s’isvizzeru Timothe Mumenthaler, chi at binchidu sa medalla de oro cun su tempus de 20”28. Su cataffale est bistadu cumpletadu dae un’atteru isvizzeru, William Reais, chi at binchidu sa medalla de brunzu cun su tempus de 20”47. Sa porfia est bistada crispa e battagliada, cun sos menzus curridores de s’Europa chi ant bogadu su menzus de issos in custa gara.

Filippo Tortu, naschidu in Milano su 15 de Lampadas de su 1998, est cunsideradu una de sas promissas de talentu meda de s’atletica italiana. Dae cando fit giovanu, at mustradu una furrida desamplada e una capatzidade chi li est naschida, de contrappuntare a livellu artu meda. Sa dedissione sua a s’allenamentu e sa determina che l’ant giuttu a
conchistare risurtados istravanados, diventande una figura de importu in sa bista isportiva natzionale e internatzionale.

Sa medalla de arghentu binchida in Roma, est non solu unu risurtadu personale de importu mannu po Tortu, ma puru unu contribbudu de signifficu a s’isquadra de s’Italia, chi sighit a collire sutzessos in custa cumpetissione de s’Europa. Sa proa de Tortu est bistada sighida cun attentzione meda dae sos media e sos tiffosos, chi ant tzelebradu su sutzessu sou commente unu signale de sa creschida custante de s’atletica italiana.

Pustis de sa porfia, s’attentzione de Tortu e de s’isquadra italiana si che andat commo a sa 4×100, unu abbenimentu in su cale s’Italia at brilladu medas bortas. Sa determina e s’ispiritu de isquadra si podent intendere, e sa medalla de arghentu de Tortu est una resone in pius po accomettare cun grista sas pius accurzas porfias.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22