Su logu sacru nuragicu de Santa Ittoria in Serri, sighit a surprendere cun iscopertas archeologicas , novas e istravanadas, iscopiande cantos importantes de su passadu de sa Sardigna. Una de sas urtimas iscopertas, bennida a sa lughe in su mentres de una campagna de iscavos in sa zura de su logu sacru in antis, est unu modello pitticcu de nuraghe, chi dae pagu est bistadu accontzadu e presentadu a su pubbricu.

Custu modellu pitticcu, no est solu un’opera fatta bene, ma est puru arricchidu de arreos e decoratziones a bandas biascias, chi contant s’usu votivu chi si nde faghiat in sa simana nuragica.

Sa calidade artistica e s’importantzia istorica de su modellu, non dant notissias pretzisas supra su rolu de sos nuraghes in sa vida religiosa e sotziale de sas popolatziones antigas de sa Sardigna. Custu accattu, imparis a atterras relichias e a sas istrutturas novas postas in lughe dae sos iscavos, dat unu contribbutu importante meda po fraigare s’istoria de s’iscrocca de Serri e de tottu sa Sardigna.

Donzi iscoperta aggiunghet unu passu fundamentale po nos faghere cumprendere commente biviant, creiant e operaiant sas comunidades nuragicas. Sa presentada de su modellu accontzadu est bistadu unu abbenimentu de importantzia manna po sa comunidade locale e po sos istudiosos de cussu campu. In mesu de sos chi fint presentes bi fit puru Ilaria Portas, assessora a sos benes culturales de sa regione Sardigna, chi at evidentziadu s’importantzia de preservare e baloritzare su patrimoniu culturale de sa regione sarda.ù

Paola Casula, cunsizzera de sa Regione Sardigna, at evidentziadu commente custos accattos pottant tennere un’influentzia importante meda, no solu supra de sa connoschentzia istorica, ma puru supra de su turismu culturale,faghinde creschere s’ammaju de sa Sardigna, commente puntu de interessiu istoricu e archeologicu. Elena Anna Boldetti, segretaria regionale de su Ministeru de sa Cultura po sa Sardigna, at rebbuidu s’accottu de su Ministeru po disignos commente custu, essentziales po allocare su patrimoniu culturale.

S’abbenimentu at fattu partetzipare, no solu sos espertos de su campu,ma puru sos rappresentantes de sas istitussiones locales. Sos sindicos de s’iscrocca, sos amministradores e sos assotzios culturales.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22