Sa situassione de s’accolomia de sas famiglias sardas est semper pius critica, cun d’unu tertzu de sa populassione chi est a arriscu de pobertade. Segundu una chirca de sos datos de s’Istat 2022-2023, chi est bistada fatta dae s’ANAP Confartigianadu Sardigna, S’assotziu Nazionale de sos Betzos e sos Pensionados, su 7% de sos sardos, bivet in
cunditziones de mancantzias materiales e sotziales graves.

Custu iscenariu, chi benit aggravadu dae s’inflazione, chi at abbassadu sos redditos beros, evidentziat sa netzessidade apprettosa de faghere interventos punnados po mezzorare sas conditziones de vida in sa regione.

Sa privassione materiale e sotziale grave at fertu su 6,9% de sos sardos, unu creschimentu in cunfrontu a su 6,7% de su 2022 e pius artu de sa media natzionale de su 4,7%. Bell’e chi s’aumentu de sos pretzios, sa parte de sa popolatzione isulana chi est a arriscu de pobertade est falada a su 29% in su 2023, in cunfrontu a su 30,8% de s’annu passadu.

Custos numeros mustrant commente unu tertzu de sa populassione sarda gherret donzi die po consumare pastos dignitosos, po si curare, tennere domos decorosas e istudiare, reflettinde sa situatzione cumplessa de s’accolomia e sotziale de sa Sardigna in su 2023.

In daesegus de custos datos, bi sunt personase beras: betzos e pensionados cun reddidos bassos meda, chie non tenet tribagliu, famiglias inue tribagliati unu solu e zente chi su tribagliu l’at perdidu. Custas fascas debiles, cun s’inflatzione e sas crisis passadas, ant perdidu sa capatzidade de ispendere.

Sa’umentu de sa pobertade de sos betzos e sos pensionados, est unu fenomenu chi preoccupat meda e dimandat s’attentzione apprettosa de sa sotziedade e de su guvernu. Cussos chi po 40/50 annos ant dadu unu contribbudu po fraigare sas comunidades nostras tiana podere godire de una bezzesa prena de dignidade e siguresa. Bell’e gai, medas de issos gherrant po sulenare sos bisonzos fundamentales commente mandicu, alloggiu e assistentzia in sa sanidade.

Accomettare sa pobertade in sas fascas pius debiles, no est solu una chistione de zustissia sotziale, ma puru de responsabilidade de tottus e de imbestimentu in su tempus benidore de sas sotziedades nostras. Bisonzat de tribagliare imparis po garantire chi donzi essere umanu potat imbezzare cun dignidade, siguresa e rispettu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna, unu modellu novu de continuidade aerea approbadu dae sa Cummissione.

Sa Cummissione Guvernu de s’Iscrocca de su Cunsizzu Regionale,ghiada dae Roberto Li Gioi(M5S), at dadu parrere arrimaderu a maggiorantzia, cun su tzentru dresta chi no at votadu, a su modellu novu de continuidade aerea chi est bistadu proponnidu dae sa Giunta Todde.

Pustis de aere intesu s’assessore a sos carrares Barbara Manca, su testu at a torrare cras in Giunta e at essere luego mandadu a su Mit po sa frimma de su decretu e po  essere pubbricadu in sa Gazzetta Uffitziale de s’Unione Europea. S’intentu est est de pubbricare su bandu intre su 29 de capudanni po faghere partire su serviziu novu dae  s’istiu 2026.

Sa continuidade at a durare battoro annos e at a tennere battoro fascas a die invetze de sas tres de como, pius frecuentzias, su controllu de sa disponibilidade cun sa possibilidade de azzunghere atteros bolos pagados dae sa Regione e cun tariffas pius bassas: su Casteddu-Roma po andare e torrare at a minimare dae sos 147 a sos 100 euros, cun atteros abbasciamentos de su 30% po sos piccioccos sutta de sos 14 annos e chentza pagare nudda po sos pizzinnos fintzas a sos duos annos chentza logu po si setzere. Sa numeru de chie at a tennere benefitzios at essere pius manna e at  incrudere militares,tribagliadores chi bistant in Sardigna,isportivos chi faghent parte de sotziedades isulanas, zente chi no bistat in Sardigna ma tenet parentes fintzas a su terzu gradu, chie tenet sa lezze 104 e sos tutores legales de sos chi istant in Sardigna.

In su bandu at essere cunsiderada menzus s’offerta tennica chi cussa accolomica po garantire sa calidade de su servitziu e bi at essere puru una cabbina de regia e unu controllu supra sa mobbilidade de s’iscrocca po regulare in donzi momentu sa continuidade nova. Sa porfia como po sa Sardigna at essere de traduire custa novidade in d’unu servitziu chi siat balidu e firmu abberu, capatze de rispondere a sas esigentzias de sos sardos e binchere sas crititzidades chi dae annos accumpanzant su dirittu a sa mobilidade de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22